Уран бүтээлч А.Дөлгөөн бие даасан гурав дахь үзэсгэлэнгээ “Дөлгөөн холболт” нэртэйгээр дэлгэх гэж байна.
Тэрбээр өмнөх үзэсгэлэнгүүддээ голчлон батик (даавуу, торгон дээр зурах урлаг)-ийн өвөрмөц арга, техникийг ашиглан өөрийн үзэл санааг илэрхийлдэг байсан бол энэ удаагийн үзэсгэлэнгээрээ дүрслэх урлагийн олон төрлийн арга техникүүдийг ашиглан урласан шинэ бүтээлүүдээ толилуулах аж.
Уран бүтээлч “Дөлгөөн холболт” үзэсгэлэнгээрээ хүний мэдрэмж, сэтгэл хөдлөл, оюун санааг дөлгөөн бөгөөд хурц бусаар холбон илэрхийлэхийг зорьжээ. Түүнчлэн эл үзэсгэлэнгээс тэс өөр мөн чанартай материалууд хоорондоо хэрхэн хоршин зохицож нэг өнгө, илэрхийлэлд уусаж буйг мэдрэх боломжтой.
“Дөлгөөн холболт” үзэсгэлэн энэ сарын 19-нд Г.Занабазарын нэрэмжит Дүрслэх урлагийн музейн үзэсгэлэнгийн танхимд нээх бөгөөд энэ сарын 29-нийг дуустал үргэлжилнэ.
