ЗХУ-ын Ардын жүжигчин Муслим Магомаевын дурсгалд зориулсан “Орфей-2024” олон улсын уралдаан өнөө жил долоо дахь удаагаа болно. Энэ жил есөн орны 200 гаруй мэргэжлийн дуурийн дуучид нэгдүгээр шатанд оролцсоноос хоёрдугаар шатанд 81 дуучин тунаад байна. Хоёрдугаар шатанд шалгарсан дуучин Бүгд Найрамдах Чечень Улсын “Сувдан сондор” хэмээн өргөмжлөгдсөн Филармонийн тайзнаа ирэх арваннэгдүгээр сарын 13-17-ны өдрүүдэд өрсөлдөх юм.
Тэгвэл, ОХУ-ын хөгжмийн дээд боловсролын тэргүүлэх академи, мэргэжлийн их, дээд сургуулиуд болон ОХУ-ын Большой, Мариинский, Новая опера, Геликон-Опера зэрэг томоохон театрууд, бүс нутгуудын эрдмийн театруудаас мэдүүлсэн тэргүүн гоцлоочдын дунд Гнесиныхны нэрэмжит Москвагийн Хөгжмийн академийн магистрантурт суралцаж буй 25 настай монгол оюутан Баатарын Доржнамжингийн нэр оржээ.
Сонирхуулахад, Б.Доржнамжин нь тун саяан Москва хотноо болсон “Grand stage award” олон улсын нэр хүндтэй уралдаанаас Гранпри шагнал хүртсэн билээ.
