Тэрбээр "Ховор хүмүүс", "Тэмцэл", "Хааны сүүлчийн хатан" зэрэг олон кинонд дүр мөнхөлсөн төдийгүй “Гарын таван хуруу” киноны Должин, “Өглөө” киноны Оюундарийн дүрээрээ олны танил болсон билээ. Мөн "Зуслангийн чөтгөр", "Еэ еэ, шар Будаа" зэрэг 20-иод кинонд гол болон туслах найруулагчаар ажилласан байдаг бөгөөд чамгүй олон кинонд дуу оруулсан ахмад уран бүтээлч билээ.
"Тунгалаг тамир" киноны Хонгорын дүрээрээ үзэгч түмний хайр хүндэтгэлийг хүлээсэн жүжигчин Н.Нямдаваагийн гэргий гэдгээр нь түүнийг олон түмэн мэддэг юм. Түүнчлэн цөөн хэдэн уран бүтээлч гэр бүлүүдийн нэг болох энэ гэр бүлийн бүх гишүүд кино урлагтай ямар нэг байдлаар холбогдсон байдаг. Тухайлбал, том хүү Н.Бадрал нь "Би чамд хайртай" киноны Баяраагийн дүрээрээ олны танил болсон бол бага хүү Н.Бат-Амгалан нь дөнгөж гуравхан настайдаа “Дэгдээхий нас” киноны гол дүрийг бүтээж, жаахан томроод "Гарын таван хуруу" киноны бага хүүгийн дүрийг бүтээж байжээ. Тэрбээр “Төр засаг хийсэн бүтээсэн хөдөлмөрийг минь үнэлж ивээлээ хайрлаж байна. Урьд нь хүмүүс киноны нээлт, ёслоллын үеэр намайг гавьяат хэмээн дуудаж, энд тэнд тааралдсан хүмүүс ч гавьяат аа гэдэг байсан. Санаа зовж, зарим нэгэнд нь эгч нь гавьяат биш шүү дээ гэж хэлдэг ч дандаа тайлбарлаад байх хэцүү. Аргагүй л ард түмний амны бэлгээр боллоо” хэмээн ярьсан байна.
