Монгол Улсын Ардын жүжигчин, дэлхийн шилдэг баритон, дуурийн дуучин Э.Амартүвшин өнгөрсөн гуравдугаар сард эх орондоо Ж.Вердийн “Макбет” дуурь болон дэлхийн шилдэг уран бүтээлүүдээс бүрдсэн “Gala concert” тоглолтоо хийсэн. Түүнчлэн наймдугаар сард сонгодог урлагийн домог Пласидо Доминго тэргүүтэй дэлхийн шилдгүүдтэй хамтарсан тоглолтоо мөн хийсэн.
Зөвхөн энэ онд гэхэд л Э.Амартүвшин Италийн Милан хотын “Ла Скала” театр, Италийн Верона хотын алдарт задгай театр болох “Arena di Verona”, ХБНГУ-ын “Deutsche oper Berlin” театр, АНУ-ын Сан-Францискогийн дуурийн театр, Францын Лион хотын дуурийн театр зэрэг дэлхийн алдартай театруудын тайзнаа гарчээ. Тэгвэл тэрбээр энэ арванхоёрдугаар сард тэрбээр ХБНГУ-ын Баварийн үндэсний дуурийн театрт Ж.Вердийн “Айда” дуурьт дуулах ажээ.
Сонирхуулахад, Э.Амартүвшин Ж.Вердийн “Риголетто” дуурьт Монгол, Герман, Итали, Бельги, Испани, Австрали, Англи гэхчилэн дэлхийн есөн улсын 25 хотод 99 удаа дуулаад буй аж. Тэрбээр эл дуурийн 100 дахь удаагийн тоглолтоо энэ арванхоёрдугаар сард Австрийн Вена хотод хийхээр төлөвлөжээ.
