2014 онд ОХУ-ын Санкт-Петербург хотын Театр урлагийн академийг төгссөн нэг ангийн зургаан нөхөд есөн жилийн дараа нэгдэж, өөрсдийн театрыг байгуулсан нь өнөөдрийн “Про” театр. Ерөнхийлбөл жүжигчид, нарийвчилбал хүүхэлдэйн театрын жүжигчнээр мэргэшсэн залуус. Тиймээс тэд драмын, сонгодог жүжгүүдээс гадна хүүхдийн жүжигт төвлөрөн ажилладаг. Тус театрын жүжигчин Б.Билгүүнтэй театрын урлагт шимтэгсэд “Про” театрын бүтээл, Францын алдарт зохиолч Виктор Хюгогийн “Инээмтгийн хүн” романаас сэдэвлэсэн ижил нэрт визуал драмын жүжгийн Гуинпленийн дүрээр “дотно танилцсан” гэхэд хилсдэхгүй. Үргэлжлүүлэн түүнтэй мөн л Францын алдарт зохиолч Александр Дюмагийн романаас сэдэвлэсэн “Шадар гурван цэрэг” физикл драмын жүжгийн Бекингем гүнгээр “уулзсан” юм. Театртаа жүжигчнээс гадна зураач тэргүүтэй олон үүргийг давхан гүйцэтгэдэг тэрбээр сүүлийн үед хөгжилтэй, сэтгэл хөдөлгөм бичлэгүүд хийн цахим хуудсандаа нийтлэх болсон нь үзэгчдэд таалагддаг болоод буй.
