Чех улсын Оломоуц хотын Моравийн театрын балетын гоцлооч Хуан ШаоШуай (Huang Shaoshuai) Монгол Улсад ирлээ. Тэрбээр УДБЭТ-ын уран бүтээл, А.Аданы “Жизель” балетын Альберт болон Па-де-дед бүжиглэх юм. Тодруулбал, хоёрдугаар сарын 15-нд Па-де-дед, хоёрдугаар сарын 16-нд Альбертын дүрийг бүтээнэ. Хоёрдугаар сарын 16-нд түүнтэй хамт “Жизель”-д Гавьяат жүжигчин Б.Саруул бүжиглэнэ.
Хуан ШаоШуай нь балетын жүжигчнээс гадна ахлах зэрэгтэй мэргэжлийн балетын багш бөгөөд тэрбээр “Кармен”, “Болеро”, “Дориан Грейгийн зураг”, “Хунт нуур”, “Цөмөөхэй”, “Жизель”, “Дон Кихот”, “Коппелия”, “Ла Корсар”, “Анна Каренина” зэрэг 30 гаруй балетын гол дүрийг бүтээжээ.
