Засгийн газрын тогтоолоор Монголын төр, шашин, соёл урлагийн нэрт зүтгэлтэн Өндөр гэгээн Г.Занабазарын мэндэлсний 390 жилийн ойг тэмдэглэн өнгөрүүлэх шийдвэр гарчээ.
Энэ хүрээнд “Чингис хаан” үндэсний музейгээс Чингис хаан судлалын олон улсын холбоотой хамтран “Өндөр гэгээн Занабазарын бүтээл туурвил, судалгааны арга зүй” сэдвээр Оросын Холбооны Улсын ШУА-ийн Дорно дахин судлалын хүрээлэнгийн эрдэм шинжилгээний тэргүүлэх ажилтан Сурун Ханда Сыртыпова олон нийтэд зориулсан сонирхолтой, үнэ төлбөргүй лекц уншлаа.
Тэрбээр “Өндөр гэгээн Занабазарыг 2500 жилийн түүхэн дэх бурхан шашны уран бүтээлчдийн дундаас ялгардаг төдийгүй дахин давтагдашгүй загвар хийц гаргасан байдгаараа онцлогтой.
Түүний бүтээл туурвилыг судлахад иж бүрэн арга зүй хамгийн чухал. Арга зүйн давуу тал нь Өндөр гэгээн Занабазарын уран бүтээлийн сэдэв, чиглэл, оюун санаа бодлын сонирхлыг тодорхойлохын зэрэгцээ, Монголын шарын шашин, бурхны урлагийн түүхэн дэх хамгийн чухал үйл явдал, зарчмуудыг тодорхойлж өгдөг” гэдгийг тодотгов.
