Монгол Улсын Гавьяат жүжигчин, дуурийн нэрт дуучин Жамъянгийн Цэцэгээ таалал төгслөө.
Жамъянгийн Цэцэгээ нь 1974 онд Лениннрадын Консерваторийг Тамара Новиченкогийн удирдлага дор дуурийн колоратура-сопрано дуучнаар төгсөж ирээд УДБЭТ-т 30 жилийн туршид “Травиата” дуурийн Виолетта, “Севилийн үсчин” -дуурийн Розина, “Риголетто” -дуурийн Жильда, “Зарц хатагтай” дуурийн Серпина, “Увидаст лимбэ” – дуурийн Шөнийн хатан, “Шивээ Хиагт” -дуурийн Гэрэл зэрэг дэлхийн болон үндэсний томоохон дууриудын гол ба туслах дүрүүдэд дуулж байлаа.
Тэрбээр байгалийн ховорхон заяагдсан “жиргээ” буюу уянгын колоратура хоолойгоороо Монголын дуурийн дуулаачийн түүхэнд онцгой байр суурь эзэлсэн гарамгай дуучин, багш хүн байв.
Тэрбээр Виолетта, Розина, Жильда Гэрэл дүрүүдийн аринуудыг, А.Алябьевын “Соловей” – “Алтан гургалдай” романсыг дэлхийн колоратура түвшинд дуулсан нь манай дуурийн урлагийн бахархал болсон нандин өв санд зүй ёсны багтдаг билээ.
Ж.Цэцэгээ нь Төрийн соёрхолт, Ардын жүжигчин, морин хуурч, хөгжмийн зохиолч Гомбодоржийн Жамъянгийн охин юм. Мөн тэрбээр Төрийн соёрхолт, “Камертон” хамтлагийн ахлагч Д.Болдын ээж юм.
