Монгол, Өмнөд Солонгос ын хамтарсан арга хэмжээ зохион байгуулагч анхны энтертайнмент компани болох “Evandis Entertainment”-аас К-поп урсгалын хамгийн том төлөөлөл, Өмнөд Солонгосын алдарт “Big Bang” хамтлагийн гишүүн, дуучин Taeyang-ийн тоглолтыг Улаанбаатар хотод зохион байгуулах гэж буй. Эл тоглолт Төв цэнгэлдэх хүрээлэнд ирэх зургаадугаар сарын 21-нд болно.
Taeyang гэж хэн бэ
Taeyang буюу Дон Ён Бэ 1988 оны тавдугаар сарын 18-нд Өмнөд Солонгосын Ужинбү хотод төржээ. Харин түүний тайзны нэр болох Taeyang гэдэг нь солонгосоос орчуулбал “нар” гэсэн утгатай аж. Тэрбээр 12 настайгаасаа “YG Entertainment”-д бэлтгэгдэж, зургаан жилийн турш бэлтгэгдсэний эцэст дебютээ хийжээ. Бэлтгэгдэж байх үедээ нас чацуу G Dragon-той сайн найзууд болж, GDYB нэртэй хамтлаг байгуулахаар төлөвлөж байсан ч “YG Entertainment”-аас “Big Bang” хамтлагийг байгуулахаар шийдэж, эл хамтлагийн бүрэлдэхүүнд тэд багтсанаар гоцлол дуучин, гоцлол бүжигчний үүрэг гүйцэтгэж ирсэн юм.
Англи, япон, испани хэлээр ярьж, дуулж чаддаг тэрбээр 2008 оноос эхлэн бие даасан уран бүтээлээ хийж эхэлсэн бөгөөд 2010 онд анхны соло цомгоо “Solar” нэртэйгээр гаргаж, 2014 гаргасан “Rise” цомгоороо “Billboard World Albums Chart”-ыг тэргүүлж, “Billboard 200” жагсаалтад багтаж, дэлхийн хөгжмийн зах зээлд асар өндөр амжилт үзүүлсэн юм. Үргэлжлүүлэн 2017 онд “White night” цомгийг сонсогчдод хүргэсэн бөгөөд “Billboard” сэтгүүлд түүнийг “Маш ховор K-Pop, R-B од” хэмээн тодорхойлсон байдаг. Хамгийн сүүлд тэрбээр 2023 онд “Down to Earth” хэмээх EP цомгоо олны хүртээл болгожээ.
