Өнөөдөр Дэлхийн бүжгийн өдөр. Энэ өдрийг 1982 онд ЮНЕСКО-гийн Олон улсын театрын хүрээлэнгийн санаачилгаар үүсгэн байгуулсан бөгөөд бүжгийн урлагийг дэлхий даяар хүндэтгэн тэмдэглэх зорилготой.
Уг өдрийг сонгодог бүжгийн нэрт зүтгэлтэн Жан Жорж Новеррийн (Jean-Georges Noverre, 1727–1810) төрсөн өдрөөр (дөрөвдүгээр сарын 29) тэмдэглэдэг. Түүнийг “Орчин үеийн балетын эцэг” гэж үздэг.
Энэхүү өдрийн зорилго нь бүжгийн урлагийн ач холбогдлыг олон нийтэд ойлгуулах, дэмжих, бүжигчид, бүжгийн байгууллагуудыг урамшуулах юм. Мөн улс үндэстний хил, соёлын ялгааг үл харгалзан бүжгээр дамжуулан хүмүүст эв нэгдлийг мэдрүүлэхийг зорьдог.
2025 оны Дэлхийн бүжгийн өдрийн албан ёсны уриа нь “Бүжгээр эрх чөлөөг мэдрэхүй” (“Dancing our way to freedom”) юм. Энэ уриа нь бүжиг нь хувь хүний сэтгэл хөдлөл, соёл, нийгмийн хүрээнд эрх чөлөөг илэрхийлэх хүчтэй хэрэгсэл болохыг онцолж байна.
