Богдхан уулын дархан цаазат газрын Их тэнгэрийн аманд барьж буй Байгалийн шинжлэх ухааны үндэсний музейг оролцоонд суурилсан, соёл, шинжлэх ухааны орон зай, хүүхэд, залуучуудын боловсролыг дэмжих төв болгож хөгжүүлэхээр шийдвэрлэснийг Соёл, спорт, аялал жуулчлал, залуучуудын яамнаас мэдээлэв. Үүний хүрээнд олон улсын зөвлөх үйлчилгээний “Лорд культурал ресорсерс” компанитай хамтран ажиллах гэрээ байгуулжээ. Байгалийн түүхийн музейн барилгыг 2019 онд Засгийн газрын шийдвэрээр буулгаж, суурин дээр нь одоогийн “Чингис хаан” үндэсний музейг байгуулсан. Харин тус музейг Үлэг гүрвэлийн төв музей (хуучнаар Лениний)-н байранд түр хугацаанд байршуулахаар нүүлгэсэн юм. Тэгвэл Байгалийн шинжлэх ухааны үндэсний болгож нэрийг нь өөрчилсөн музейн шинэ барилгын ажил өдгөө 50 хувьтай буй гэнэ. Дээрх гэрээний хүрээнд олон улсын байгууллагынхан музейн үзэл баримтлалын шинжилгээ, хөгжлийн стратеги, зай талбай, зохион байгуулалт, үзэсгэлэнгийн дизайны төлөвлөлтийг дэлхийн жишигт нийцүүлэн боловсруулж, хүүхэд, залуучуудын боловсролыг дэмжих чиглэлээр үйл ажиллагааг нь өргөжүүлэх аж. Ташрамд дурдахад, Байгалийн шинжлэх ухааны үндэсний музейн барилгыг 41.7 мянган ам метр талбайтайгаар төлөвлөсөн бөгөөд энэ нь манай улсын түүхэн дэх хамгийн том хэмжээтэй музейн байгууламжид тооцогдож байна.
Байгалийн түүхийн музейг хүүхэд, залуучуудын боловсролыг дэмжих төв болгож хөгжүүлнэ
