Анхны яргуй ариухан ягаахан
Анхны бороо ариухан тунгалаг
Анхны цас ариухан мөнгөлөг
Анхны хайр ариухан гэгээлэг
Анхных болгон ариухан өнгөлөг
Анхных болгон сайхан аялгуутай.
Анхны яргуй усны шувуудын аялгуутай
Анхны бороо агтны туурайн аялгуутай
Анхны цас алхах гишгэхэд аялгуутай
Анхны хайр алаг зүрхний аялгуутай
Анхных болгон ариухан айзамтай
Анхных болгон сайхан үнэртэй
Анхны яргуй даамай ялдам үнэртэй
Анхны бороо азоны агаар үнэртэй
Анхны цас асар тэнгэрийн үнэртэй
Анхны хайр дайхин сэвлэг үнэртэй
Анхных болгон ариухан үнэртэй
Анхных болгон сайхан амттай
Анхны яргуй анагаах үрлийн амттай
Анхны бороо рашаан булгийн амттай
Анхны цас амьсгаа залгим амттай
Анхны хайр алим жимсний амттай
Анхных болгон ариухан амтлаг
Анхных болгон сайхан дурсамжтай
Анхны яргуйнаар танилцсан минь дурсамжтай
Анхны борооноор бичсэн шүлэг минь дурсамжтай
Анхны цаснаар хүлээж зогссон минь дурсамжтай
Анхны хайр амьдралын туршид дурсамжтай
Анхных болгон ариухан дурсамжтай
Анхных болгон хоромхон
Анхны яргуй хагдрах нь хоромхон
Анхны бороо арилах нь хоромхон
Анхны цас хайлах нь хоромхон
Анхны хайр амьдрах нь хоромхон
Анхных болгон ашид мөнхийн хоромхон
Анхных болгон ариухан сайхан
Анхны яргуйнаар аялж зугаалах сайхан
Анхны бороог алгаараа тосох сайхан
Анхны цасан дээр мөрөө гаргах сайхан
Анхны хайр амьдрал болох нь сайхан
Анхных болгон ариухан сайхан
Анхных болгоныг хайрлах нь бүр сайхан
www.URLAG.mn
