Буриадын ардын жүжигчин, дуучин Б.Амархүүг өнөө цагийн хамгийн романтик залуу хэмээн олон хүн хүлээн зөвшөөрөх болжээ. Тэрбээр Азийн супер модель, мисс О.Ариунзулыг найз бүсгүйгээрээ сонгосноос хойш баяр бүрээр хайртдаа өвөрмөц содон гэнэтийн бэлэг бэлтгэж, олон бүсгүйчүүдийн атаархлыг төрүүлсээр байгаа. Хачирхалтай нь түүний бэлэг бүрийг том гэгчийн сарнай цэцгийн баглаа дагалддаг.
Түүнчлэн дуучин залуу найз бүсгүйтэйгээ уулзах бүртээ 1-3 ширхэг улаан сарнай бэлэглэж заншсан хэмээн ойр дотныхон нь жиг жуг гэлцдэг юм билээ. Мөн бас нэгэн нууцыг задруулахад, Б.Амархүү “Бэлэглэсэн сарнай маань сая болох цагт би түүндээ сүйн бөгж бэлэглэнэ” хэмээн ярьдаг гэнэ.
Тэгвэл “Бид удахгүй хуримаа хийнэ” хэмээн ярих болсныг нь үзэхэд түүний найз бүсгүйдээ бэлэглэсэн сарнайн тоо саяд тун дөхөж байгаа бололтой. Б.Амархүүгийн нэгэн дотны найзын хэлснээр дуучин залуу ч Гэгээн хайрын баяраас хойш найз бүсгүйдээ бэлэглэдэг сарнай цэцгийнхээ тоог эрс нэмсэн гэнэ. Тэгэхээр Б.Амархүү ч бас сүйт бүсгүйдээ бөгж бэлэглэж, хуримын зараа тараахаар яарч байгаа бололтой.
Эх сурвалж: mnews.mn
