УДЭТ-ын жүжигчин МУСТА Ц.Баясгалан Францын нэрт дуучин Эдит Пиафын амьдрал, уран бүтээлийг харуулсан моно мюкикль драмын жүжгийг өнгөрсөн онд тайзнаа тавьсан.
Энэ жүжгийг Оросын зохиолч Нина Мазурийн зохиолоор тус театрын найруулагч МУУГЗ Б.Баатар найруулж, үзэгчдийн сэтгэлд хүрч чадсан юм. Жүжигчин Ц.Баясгалан нь 1997 оноос эхлэн УДЭТ-т жүжигчнээр ажиллах хугацаанд “Нууц амраг чинь болъё” жүжгийн Шүр, “Хайрын виз” жүжгийн Ану, “Шар тэнгисийн тарчлаан”-ы Сарнай, “Парисын дарь эхийн сүм” жүжгийн Лис, Розина нарын дүрд, “Солиотой жүжиг”-ийн Жанна, “Домогт Ану хатан” жүжгийн Ану хатан, “Эсрэг дурлал” жүжгийн шивэгчний дүр гээд 50 гаруй гол болон туслах дүрийг бүтээж, үзэгчдийн талархлыг хүлээж, олон түмэндээ хэдийнэ танил болсон авъяаслаг уран бүтээлч юм. Түүний хувьд энэ жил дахин нэг бүхий шинэ уран бүтээлийг тайзнаа тавьсан билээ. Харин жүжигчин Ц.Баясгалан “Эдит Пиаф” жүжгээрээ Косово улсад болох ганц хүний жүжгийн фестивальд оролцохоор болсон байна.
С.НАРАН
