Монголд Улсад суугаа Итали Улсын ЭСЯ-наас “Италийн долоо хоног”-ийг Улаанбаатар хотноо анх удаа зохион байгуулж байна.
Энэ өдрүүдэд урлаг, дизайн, загвар, хөгжим болон амьдралын хэв маягийг харуулсан орчин үеийн Италийн соёл, шилдэг ололтыг таниулж буй юм. Мөн Италийн бүтээгдэхүүний албан ёсны дистрибьютер, худалдааны байгууллагууд олон нийтэд тус улсын соёлыг зөвхөн музейн орчинд төдийгүй Улаанбаатар хотын өдөр тутмын амьдралын хэмнэл дунд мэдрэх боломж олгож байна.
Энэ хүрээнд “Итали бол моод-Итали тэмдэглэгээ” үзэсгэлэнг “Чингис хаан” үндэсний музейд өнөөдөр нээлээ. Үзэсгэлэнд Италийн тэргүүлэх дизайнерын бүтээлээр дамжуулан дизайн, загварын ертөнцийг харуулж байна. Тухайлбал, үзэсгэлэнд Валентино Гараванигийн урласан хувцаснууд, мөн Жио Понти зэрэг нэрт дизайнерын бүтээл багтжээ. Түүнчлэн Ромын Дуурийн театрын 2016 оны “Ла Травиата” дуурийн Валентино Гаравани, Жанкарло Жамметти нарын хувцасны шийдэлтэй, София Копполагийн найруулсан тавилтад зориулан бүтээсэн хувцасны зураг, дүрслэлүүдийг дэлгэн үзүүлж байна.
Түүнчлэн үзэсгэлэнгээс Италийн загварын хөгжил болон үнэт зүйлсийг харуулсан виртуал орчны туршлага бүхий “Итали бол моод-Уламжлал, гоо зүй, тогтвортой байдал, инновац”-ыг мэдрэх боломжтой
