1936 оны Берлиний олимпын сэдэвтэй футболкыг олимпын наадмын цахим дэлгүүрүүдээр зарсан нь Германд өргөн хүрээтэй маргаан дэгдээжээ. Олон улсын олимпын хороо үүнийг зөвшөөрснөөрөө Нацистын үеийн харгис түүх, Гитлертэй холбоотой асуудлыг үл тоомсорлосон гэж олон нийт буруутгаж байна.
Тус футболк нь цахим дэлгүүрээр 39 еврогоор зарагджээ.
Германы хэвлэлд мэдээлснээр, ихэнх хүн загварт нь татагдаж тухайн футболкыг худалдаж авснаас бус нацистын суртал ухуулгыг хийх санаагүй байсан бололтой. Гэсэн ч 1936 оны цаг үеийн нөхцөл байдалтай авцалдуулан бодвол энэ футболк неонацистууд болон баруун жигүүрийн хэт даврагчдын анхаарлыг татах магадлалтай.
Германы Ногоон намын гишүүн Клара Щедлих Олон улсын олимпын хороонд хандаж уг футболкыг зарахгүй байхыг уриалжээ. Тэрбээр “Олон улсын олимпын хорооныхон, итгэлтэй байна уу. Олимпын бараа бүтээгдэхүүнийг суртал ухуулгад ашиглах юм гэж үү. Энэ үйлдлээрээ Олон улсын олимпын хороо түүхийг огт ойлгодоггүй гэдгээ харуулж байна” гэжээ.
Герман улсад нацистын эрин үеийг ил далд ямар нэг байдлаар сурталчлахыг хориглодог. Жишээлбэл, автомашины улсын дугаарт “SS” гэсэн үсэг байж болохгүй. Учир нь “SS” нь нацист Германы үеийн хагас цэрэгжсэн байгууллагын нэрийн товчлол юм.
Олон нийтийн дургүйцэл, шүүмжлэл байсан ч Олон улсын олимпын хороо маргаантай футболкоо эргүүлэн татахыг хүсэхгүй байгаа бололтой. Олон улсын олимпын хороо хэвлэлийн мэдээндээ “1936 оны Берлиний олимпоор спортын 149 төрөлд 49 орны 4483 тамирчин өрсөлдсөнийг бид мартах учиргүй” гэжээ.
Тухайн үед Адольф Гитлер зөвхөн медаль авсан герман тамирчидтай л гар барихыг хүссэн гэлцдэг. Өөрөөр хэлбэл, 1936 оны олимпын наадам нацистуудын арьс өнгөөр ялгаварлан гадуурхах үзлийг бүхэлд нь харуулсан гэж үздэг ажээ.
