Залуу минь чи бүү гунихар
Задгай цамцныхаа энгэрийг товчил
Зовлон шиг охидод жаргал шиг бүү дурла
Замын дэргэдэх гэрэл шиг шөнөөр л асдаг юм тэд чинь
Гэрэвшин ичингүйрэх харцных нь толионд
Гэгэлзэн чи үсээ янзлах хэрэггүй
Гэргийнхээ зургийг хэтэвчнээсээ салгаж
Гуниггүй харцанд нуугдах зовлонд дурлах хэрэггүй
Залуу минь чи бүү гунихар
Задгай цамцныхаа энгэрийг товчил
Зовлон шиг охидод жаргал шиг бүү дурла
Замаггүй нуурын загас шиг заримдаа л баригддаг юм тэд чинь
Ягаахан уруулынх нь богино инээмсэглэлд
Янагийн харц чулуудан догдлох хэрэггүй
Ядам хуруун дахь бөгжөө яаран сугалж
Яргуй өндийх хавраар амрагаа хүлээлгээд хэрэггүй
Залуу минь чи бүү гунихар
Задгай цамцныхаа энгэрийг товчил
Зовлон шиг охидод жаргал шиг бүү дурла
Зурмал ягаан цэцэг шиг үнэргүй байдаг юм тэд чинь
Гуниг үргээсэн санаандгүй хэлсэн хэдхэн үгэнд
Гутлынхаа улыг ханзартал хөл алдах хэрэггүй
Гэгээ тунарсан үдшээр гэргийгүй хэмээн худал хэлж
Ганцхан шөнийн жаргалдаа амьдралаа дэвсээд хэрэггүй
Залуу минь чи бүү гунихар
Задгай цамцныхаа энгэрийг товчил
Зовлон шиг охидод жаргал шиг бүү дурла
Задгай галын дөл шиг түймэр тавьчихдаг юм тэд чинь
www.URLAG.mn
