Завхан аймгийн Угсаатны зүйн танхимд XIX-XX зууны үед хамаарах шармал, мөнгөн, модон зэрэг хийц бүхий бурхдын 30 орчим бүтээл хадгалагдаж байна.
Тэдгээрийн дотор долоон мэлмийт “Цагаан дара эх” бурхны алтан шармал бүтээл онцгой байр суурь эзэлдэг. Уг бүтээлд алтан өнгөт лагшинтай, долоон мэлмийт Цагаан дара эхийг очир завилгаагаар саран мандал дээр залран суусан байдлаар дүрсэлжээ.
Баруун мутраараа дээдийн өглөгийн мутарлага үйлдэж, зүүн мутраараа бадам цэцгийн ишнээс чимхэн, цэцэг навчаар хүрээлсэн номын гэрлийн өмнө амарлингуй дүрээр залран буйгаар урласан байна. Тэрбээр ногоон өнгөт эрдэнийн титэм, зүүлт, торгон өмсгөлөөр гоёжээ.
Цагаан дара эх нь Жанрайсэг бурхны хувилгаан, Жажүд ёсны ядам бурхан хэмээн шүтэгддэг. Бүтээлд баруун гарыг өвдгөн дээр тавин эрхий болон ядам хурууг нийлүүлж, зүүн гарын эрхий, ядам хурууг мөн нийлүүлэн залбирсан мутарлагаар дүрсэлсэн нь бурхны айлдвар, аврал, энэрлийг бэлгэддэг.
XX зууны үеийн энэхүү алтан шармал бүтээлийг урласан дархны нэр тодорхойгүй бөгөөд музейн сан хөмрөгт үзмэр цуглуулгын журмаар бүртгэгдэн хадгалагдаж байна.
