Монголын рок хөгжмийн “Хурд” хамтлаг үүсгэн байгуулагдсаны 35 жилийн ойг угтан Монголын тайзны урлагт шинэ хуудас нээх томоохон уран бүтээлийн төслийг хэрэгжүүлэхээр болсныг албан ёсоор танилцууллаа.
Уг төслийн хүрээнд бүрэн хэмжээний тайзны мюзикл бүтээж, 2026 оны аравдугаар сард Улаанбаатар хотноо нээхээр төлөвлөжээ.
Тус мюзикл нь Монгол Улсад анх удаа олон улсын жишиг, дэлхийн стандартад нийцсэн мюзиклийг Монголд нутагшуулах, мэргэжлийн өндөр түвшинд үзэгчдэд толилуулах зорилготой. Цаашид уг бүтээлийг Англи, Баруун Европ болон Зүүн Өмнөд Азийн орнуудад тоглуулах урт хугацааны зорилттой байна.
ИБУИНХУ дахь Монгол Улсын Соёлын элч Ж.Өнөрмаа Англи дах продюсераар ажиллаж, дүрийн сонгон шалгаруулалт, дууны болон гэрэлтүүлгийн дизайн, хөгжмийн дуугаралт, инженерийн шийдэл, бүжиг дэглээчээр мэргэшсэн Британийн мастер уран бүтээлчдийг сонгон ажиллуулна. Тэд Монголд уригдан, Монгол уран бүтээлчидтэй хамтран ажиллах хугацаандаа театр, урлагийн салбарын уран бүтээлчдэд зориулсан мэргэжлийн мастер сургалтуудыг зааж, Монголын хөгжмийн театрын салбарын хөгжилд хувь нэмрээ оруулна. Продюсерын баг Британийн уран бүтээлчдийг 2026 оны дөрөвдүгээр сард зарлахаар төлөвлөж байна.
Мөн дүрийн шалгаруулалтад Британийн мэргэжлийн жүжүгчид уран бүтээлчид болон Монголын сор болсон залуу уран бүтээлчийг шалгаруулан оролцуулах юм байна.
Төслийн Монгол баг:
- Төслийн санаачлагч: Төрийн соёрхолт “Хурд” хамтлаг
- Ерөнхий продюсер: Гавьяат жүжигчин Д.Отгонбаяр (Төрийн соёрхолт “Хурд” хамтлагийн гитарчин)
- Продюсер: Ж.Өнөрмаа (ИБУИНХУ дахь Монгол Улсын Соёлын элч, продюсер)
- Төслийн менежер, гүйцэтгэх продюсер: О.Мөнхтуул (“Хурд” хамтлаг)
- Ерөнхий найруулагч: Б.Даваасүрэн (“Про” театрын найруулагч, жүжигчин)
- Уран сайхны удирдаач: Б.Анхбаатар (“Про” театрын найруулагч, жүжигчин)
- Хөгжмийн найруулагч: Урлагийн гавьяат зүтгэлтэн, хөгжмийн зохиолч Б.Чинбат
- Зохиолч: Г.Бадамрагчаа
- Зөвлөх: Төрийн шагналт, Урлагийн гавьяат зүтгэлтэн, найруулагч Н.Наранбаатар
