Монгол-Германы боловсролын салбарын хамтын ажиллагааны 100 жилийн ойг тохиолдуулан Монгол Улсын Соёлын элч, уран бүтээлч Цэндийн Ган-Эрдэнэ “Мөнх тэнгэрт” бие даасан үзэсгэлэнгээ 2026 оны тавдугаар сарын 8-наас зургаадугаар сарын 13-ны хооронд “Чингис хаан” Үндэсний музейд толилуулна.
Ц.Ган-Эрдэнэ нь 2001 онд Соёл, урлагийн их сургуулийн харьяа Дүрслэх урлагийн дээд сургууль, 2010 онд ХБНГУ-ын Мюнстер хотын Дүрслэх урлагийн академийг тус тус дүүргэсэн, Улаанбаатар болон ХБНГУ-ын Мюнстер хотод ажиллаж, амьдардаг уран бүтээлч юм.
Монгол Улсын Соёлын элчээр 2022 оноос ажиллаж байгаа Ц.Ган-Эрдэнийн уран бүтээлд тэнгэр ба газрын хооронд орших орон зай, байгаль ба хүн төрөлхтний харилцан хамаарал, хийсвэр ба бодит оршихуйн заагийн гүн ухааны санааг илэрхийлдэг, уран бүтээлийн гол сэдэв нь тал нутгийн язгуур өв, нүүдлийн соёл, аниргүй тайван орчин байдаг.
Түүний уран бүтээлчийн үзлээр “Хүн нэгэн зэрэг хоёр орон зайд оршдог.” Нэг нь бие махбодын бодит ертөнц, нөгөө нь оюун санаа, төсөөлөл, итгэл бишрэл, дурсамжаас бүрдэх дотоод ертөнц. Энэхүү дотоод оршихуй усны мандалд эсвэл сүүдэрт тусахдаа тусгалын биет бус чанараар дамжин зөн совин, сэтгэлийн гүн гүнзгий хэмжээсийг ил тод болгодог.
2009 оноос эхлэн Ц.Ган-Эрдэнийн уран бүтээлд “Тусгал” хэмээх ойлголт гол байр суурь эзэлж, хүний дотоод бодол, итгэл үнэмшил, хүсэл найдвар зэргийг бодит ертөнцтэй холбон илэрхийлдэг болсон. Ингэснээр хийсвэр мэт орших дотоод ертөнцийг “Дээд тэнгэр”-ийн үзэлтэй уялдуулан, хүний оршихуйн мөн чанарыг зогсолтгүй урсах цаг хугацаа, мөнх оршихуй, эртний монголчуудын тэнгэр шүтэх үзэлтэй холбон харуулдаг юм. Энэ төрлийн уран бүтээл голлосон “Салхинд хийссэн хамхуулын үг” бие даасан үзэсгэлэнгээ 2023 оны зун монголчуудын хүртээл болгож байв.
Түүний бүтээлүүд Германы Art Karlsruhe олон улсын үзэсгэлэнд 10 гаруй жилийн турш амжилттай оролцсон бөгөөд Германы Museum Burg Vischering, Art Collection Henkell, VHV Holding Group, Итали дахь Art Collection Benetton зэрэг цуглуулгад хадгалагддаг.
Мөн бие даасан болон хамтарсан 200 гаруй үзэсгэлэнг ХБНГУ-ын нэр хүндтэй музей, галерей, Нью-Йоркийн UN Headquarters, KIAF Korea, SCOPE Basel International Art Fair зэрэг газарт зохион байгуулж, Нидерланд, Дани, БНСУ, Косово, Монгол Улс зэрэг орны нэр хүндтэй музей, галерейд үзэсгэлэнгүүдээрээ амжилттай оролцсон. Тэрбээр уран бүтээлээрээ Германы олон улсын нэр хүндтэй шагналуудыг хүртэж байв.
Үндэсний мэдээллийн МОНЦАМЭ агентлаг нь Монгол Улсын Соёлын элч, уран бүтээлч Ц.Ган-Эрдэнийн “Мөнх тэнгэрт” үзэсгэлэнгийн мэдээллийн түншээр ажиллаж байгаа юм.
