Алдарт дуучин Лана Дель Рей Жеймс Бондын ертөнцөд нэмэгдэж, “007 First Light” видео тоглоомын албан ёсны theme дууг дуулж, хөгжмийн зохиолч Дэвид Арнолдтой хамтран ажиллажээ.
“007 First Light” нь тагнуулч Жеймс Бондын залуу нас, анхны даалгавруудыг өгүүлэх шинэ гарал үүслийн түүхээр бүтээгдэж буйгаараа онцлог. Энэ нь Бондын дүрийг илүү шинэлэг өнцгөөс харуулах зорилготой.
Тоглоомыг “IO Interactive” хөгжүүлж байгаа бөгөөд тус компанийн гүйцэтгэх захирал Хакан Абрак: “Лана Дель Рей болон Дэвид Арнолд нарын хамтын ажиллагаа Бондын уур амьсгалыг төгс илэрхийлж, шинэ өнгө төрх авчирсан” гэжээ. Жеймс Бондын theme дуунууд үргэлж кино, тоглоомын хамгийн чухал хэсэг байсаар ирсэн. Харин энэ удаа Ланагийн уянгалаг, атмосферик хоолой, Дэвидийн сонгодог Бонд стилийн хөгжим хослон “First Light” дууг бүтээжээ. Дэвид энэ талаар “Бондын хөгжим цар хүрээ, нууцлаг байдал, драмыг нэгэн зэрэг илэрхийлэх ёстой. Лана энэ уламжлалыг хадгалж, шинэ мэдрэмж нэмсэн” гэж хэлсэн байна.
“007 First Light” тоглоом 2026 оны тавдугаар сарын 27-нд худалдаанд гарна. Урьдчилсан захиалга өгсөн хэрэглэгчдэд deluxe upgrade бэлэглэхээр төлөвлөсөн гэнэ.
