Попын хааны намтарчилсан кино болох “Michael” кино энэ өнгөрсөн баасан гарагт кинотеатруудад нээлтээ хийгээд буй.
Киноны гол дүрд Майклын төрсөн ах Жермен Жексоны хүү Жафар Жексон тоглосон юм.
Шүүмжлэгчид Жафар Жексоний дүр бүтээлт маш үнэмшилтэй, дуу бүжгийн хэсгүүд, тайзны үзүүлбэрүүд гайхалтай. Харин кино Майклыг “хэт цэвэрхэн” харуулсан. Хүнд, маргаантай асуудлуудыг орхигдуулж зарим хэсэг “өнгөцхөн мэт байсан” гэж дүгнэж байна.
Антуан Фукуагийн найруулсан энэхүү кино нь талийгаач Майкл Жексоны 1960-аад онд “Jackson 5” хамтлагаас эхэлсэн алдар нэрийн замнал, дэлхийн хамгийн том энтертайнер болсон түүхийг өгүүлнэ.
“Michael” киноны тухай “The Guardian” сэтгүүлд:
“Нэлээд өнгөц кино болжээ. Аав нь түүнийг зодож сэтгэлзүйн дарамтад байлгадаг байсан, хүүхэд насыг мэдрээгүй өнгөрсөн гэдгийг бүрэн харуулж чадаагүй. Мөн зочид буудлын тагтнаас хүүхдээ өргөсөн явдал, мөн хүүхдийн бэлгийн хүчирхийллийн буруутгалуудын талаар гаргасангүй”
“The New York Times” сонинд:
“Кино Жексоны амьдралын хамгийн хүнд асуудлуудыг орхисон. 1984 оны гуравдугаар зэргийн түлэгдэлтийн хагалгааг амжилтын хөдөлгөгч мэт харуулсан ч үүнээс үүдэлтэй өвчин намдаагчийн хамаарлыг огт харуулдаггүй. Кино нь олон хүний биширдэг хүний ялалт, алдар нэрийн түүх болжээ”
“Rolling Stone” сэтгүүлд:
“Энэ бол жинхэнэ намтар кино биш, харин гэгээнтэн Майклын тухай бүтээл. Жафар ахтайгаа маш адилхан, хөдөлгөөн, инээмсэглэл, биеийн уян хатан байдал зэргийг яг дуурайсан. Гэхдээ “Thriller”, “Motown 25”, “Beat It” зэрэг алдартай үзүүлбэрүүдийг яг хуулбарлан харуулах нь бага зэрэг гунигтай мэдрэмж төрүүлсэн”
“The Independent” вэбсайтад:
“Эцэст нь “түүний түүх үргэлжилнэ” гэсэн тайлбар гарч, үргэлжлэл хийхээр төлөвлөж байгаа юм байна. Кинонд Майкл өвчтэй хүүхдүүдтэй уулзах, Neverland Ranch-ийг дурдсан олон хэсэг орсон. Гэвч Майклыг буруутгаж байсан буруутгалуудыг хэрхэн харуулахыг оролдсон нь ойлгомжгүй” гэж бичжээ.
