Токиогийн “Шүнжүүша” хэвлэлийн газар зохиолч Г.Аюурзанын “Шүгдэн” романыг Абиру Михогийн орчуулгаар хэвлэн гаргажээ.
Энэхүү номын хавтасны дизайныг японы орчин цагийн урлагийн төлөөлөгч Хироэ Саэкийн зургаар Сано Юуяа урласан байна.
“Шүнжүүша” нь 1918 онд байгуулагдсан, 100 гаруй жилийн түүхтэй, зэнгийн их багш Догэний бүтээл, Толстой, Достоевскийн бүрэн түүврүүдийг япон хэлээр гаргасан. Мөн Хайек зэрэг эдийн засгийн онолчид, философи, уран зохиол, хөгжмийн олон буурьтай бүтээл хэвлэж түгээснээрээ алдаршсан, японы томоохон хэвлэлийн газар юм.
“Шүгдэн” романы хатуу хавтастай хувилбарыг Амазон, Ракутен, Марузен Жункудо худалдааны сайт, тус хэвлэлийн газрын вэб хуудсаар захиалга аван борлуулж эхэлжээ.
Зохиолч Гүн Г.Аюурзана нүүр ном дахь цахим хуудсаараа дамжуулан Кинокунияа зэрэг томоохон номын дэлгүүрүүдээр энэ сарын 15-наас худалдах талаар мэдээлэв.
