Монголын урчуудын эвлэлийн шагналт зураач Чойндонгийн Хүрэлбаатар “Ягаан үдэш” бие даасан үзэсгэлэнгээ “Хаан” галерейд дэлгэлээ.
Монголын нэрт зураачдын нэг тэрээр реалист чиглэлээр уран бүтээлээ туурвиж, байгалийн сэдэвт болон хөрөг зургийн төрлөөр дагнан ажилладаг бөгөөд энэ удаагийн үзэсгэлэнд ихэвчлэн шинэ бүтээлүүдээ дэлгэжээ. Монголын байгаль, ёс заншил, тал нутгийн сүр хүч, амар амгалан уур амьсгалыг уран сайхны өндөр түвшинд илэрхийлдгээрээ түүний бүтээлүүд онцлог. Нүдээр харж буй бишрэм бүхнийг бийрийн үзүүрээр бодит мэт буулгах түүний бүтээлүүд амьдралын олон талт дүр төрхийг өөрийн өнцгөөс харуулж, реализм, классицизм, романтизмын уламжлалыг бүтээлчээр шингээсэн байдаг билээ.
Зураач Ч.Хүрэлбаатар нь 1979 онд Дүрслэх урлагийн дунд сургууль, 1987 онд ОХУ-ын Санкт-Петербург хотын Урлагийн академийн Уран зургийн ангийг тус тус төгсжээ.
“Ягаан үдэш” үзэсгэлэн зургаадугаар сарын 15-ныг дуустал олны хүртээл болно.
