Дорноговь аймгийн түүхэнд хошуу захирч байсан ноёдын эдлэж хэрэглэж байсан хувцас, эд хэрэглэлээс толилуулж байна.
Энэ удаа Мэргэн вангийн хошууны ноён Амгаабазарын ганц хөвүүн Ананд-Очирын өмсөж байсан дээлийг онцоллоо.
Мэргэн вангийн хошууны ард иргэд “Бүдүүн ноён” хэмээн авгайлдаг байсан бөгөөд түүний өмсөж байсан ямбаны дээл, эмээлийн мод зэргээс харахад том биетэй, биерхүү хүн байсныг илтгэдэг байна.
Түүний өмсөж байсан таван луу хээтэй, ёнхор буюу алтан /металл/ утсаар оёсон улаан торгон ямбаны дээл, эмээлийн мод, жийжүү дөрөө нь аймгийн Музей, сургалт судалгааны төвд хадгалагдаж буй.
Эдгээр нь улаан торгон дээр таван лууг ёнхор /төмөр метал) утсаар зүү ороон урласан бөгөөд 220 см урттай, 145 см өргөнтэй, 88 см хормойн өргөн бүхий хэмжээтэй дээл, модоор наамаллаж үдэж хийсэн, намхан бүүрэгтэй, бүүрэгний хоёр талаар гуулийг хөөмөлдөж хээ гаргасан, Манжийн үед хошуу ноёдод олгож байсан эмээлийн мод болон жийжүү дөрөө юм.
Энэ дээлийг ихэвчлэн төрийн үйл хэрэг, дээдсийн хурал, чуулганд өмсдөг байсан бөгөөд дээлэнд луу ороосон нь төрийн үйл хэргийг түвшин амар явуулах, төр бат бэх байхыг бэлгэддэг аж.
Түшээт хан аймгийн Мэргэн вангийн хошуу нь Манжийн үед одоогийн Дорноговь аймгийн Сайншанд, Хатанбулаг, Хөвсгөл, Улаанбадрах, Өмнөговь аймгийн зарим сумыг хамарсан томоохон хошуу байжээ.
Чингэс хааны алтан ургийн ноён Амгаабазарын Ананд-Очир 1890-ээд оны үед хошуу захирч байжээ.
