Үзэсгэлэн Монголын Урчуудын Эвлэлийн үзэсгэлэнгийн танхимд 2026 оны зургаадугаар сарын 13-ны бямба гарагт 16:00 цагаас нээлтээ хийнэ.
Хамтарсан үзэсгэлэнд Монголын график, бар зургийн уран бүтээлчид болон ХБНГУ-ын графикийн мэргэжлийн уран бүтээлчид оролцож, график, бар зургийн уламжлалт болон орчин үеийн олон төрлийн арга техникүүдийг чөлөөтэй хослуулан бүтээсэн эх бүтээлүүдийг дэлгэн толилуулах юм. Мөн үзэсгэлэнгийн үеэр уран бүтээлчид өөрсдийн туршлага, арга барил, судалгааг бусад салбарын уран бүтээлчид болон үзэгчидтэй хуваалцах, илтгэл хэлэлцүүлэг, бар зураг хэвлэх воркшопыг хамтран зохион байгуулж, график урлагийн уламжлалт болон орчин үеийн чиг хандлагыг үзэгчдэд хүргэнэ.
Соёлын элч Ц.Ган-Эрдэнийн санаачилгаар Монголын Урчуудын Эвлэлийн дэмжлэгтэйгээр хэрэгжиж буй төслийн хүрээнд ХБНГУ-ын Райнэ болон Эссен хотод хоёр орны график урлагийн уран бүтээлчдийн солилцооны хөтөлбөр, сургалтыг өнгөрсөн дөрөвдүгээр сард зохион байгуулж, Монголын талаас “Хөх Нар” орчин үеийн урлагийн төв болон Монголын Урчуудын Эвлэлийн нийт зургаан уран бүтээлч оролцон бар зургийн уламжлалт арга техник болох торгон бар, чулуун бар, төмөр барын чиглэлээр сургалтад хамрагдсан. “График-2026” үзэсгэлэн дээрх сургалтад хамрагдсан Монгол, Герман хоёр орны уран бүтээлчдийн хамтын ажиллагааны үр дүнг олон нийтэд танилцуулж байгаагаараа онцлогтой юм.
