“Галактикийн хамгаалагчид”, “Аватар”, “Карибын тэнгисийн дээрэмчид” зэрэг кинонуудаараа дэлхийн дахинаа алдаршсан жүжигчин Зое Салдана өнөөдөр 48 нас хүрч байна. Зое Ядира Салданья-Перего нь 1978 оны энэ өдөр буюу зургаадугаар сарын 19-нд АНУ-ын Нью-Жерси мужид төржээ.
Бүжигчин мэргэжлээр суралцсан Зое Салдан жүжигчний гараа 1999 онд “Law and Order” киноны туслах дүрээр эхлүүлжээ. Харин түүний дэлгэцнээ бүтээсэн анхны киноны дүр нь “Centre Stage” (2000) киноны балетын бүжигчний дүр байв.
Дуучин Бритни Спирстэй хамт “Crossroads” (2002) кинонд тоглосноор тэрбээр үзэгчдэд илүү танигдаж, “Pirates of the Caribbean: The Curse of the Black Pearl” (2003) кинонд тоглосноор жүжигчний хувьд хүлээн зөвшөөрөгдсөн юм.
Тэрбээр амжилтын замналаа “Star Trek” киноны шинэчилсэн цувралд (2009–2016) Ньота Ухура, Жеймс Камероны “Avatar” киноны бүх ангид (2009 оноос өнөөг хүртэл) Нейтири, “Guardians of the Galaxy” (2014) тэргүүтэй “Marvel” кино ертөнцийн таван кинонд Гаморын дүр гэхчилэн 80 шахам уран бүтээлд дүр бүтээснээрээ улам бататгасаар байна.
Зое Салдана өдгөө дэлхийн түүхэн дэх хамгийн өндөр орлоготой гол дүрийн жүжигчин бөгөөд тэрбээр “Оскар” буюу Академийн шагнал, BAFTA шагнал, Шүүмжлэгчдийн нэрэмжит шагнал, “Алтан бөмбөрцөг” шагнал, SAG шагнал, Каннын кино наадмын шагнал зэрэг олон шагнал хүртээд буй.
“Time” сэтгүүлээс түүнийг 2023, 2026 онуудад дэлхийн хамгийн нөлөө бүхий 100 хүний нэгээр нэрлэжээ.
