Америкийн домогт кантри дуучин, байгаль хамгаалагч Вилли Нельсон хиймэл оюун ухааны (AI) дата төвүүдийг АНУ даяар, ялангуяа Техас мужийн хөдөө орон нутагт олноор нь барьж байгааг эрс шүүмжилж, орон нутгийн иргэдийг эдгээр төслүүдийн эсрэг тэмцэхийг уриалжээ.
Вилли Нельсон AI технологийг бүхэлд нь эсэргүүцэж байгаа бус, харин AI-г ажиллуулахын тулд баригдаж буй аварга хэмжээний дата төвүүд байгаль орчин, усны нөөц, тариалангийн газар болон хөдөөгийн иргэдийн амьдралд үзүүлэх нөлөөлөлд анхаарал хандуулахыг уриалж байгаа талаар онцолжээ. Түүний үзэж буйгаар технологийн хөгжил нь байгаль хамгаалалт, орон нутгийн эрх ашигтай тэнцвэртэй байх ёстой.
Вилли Нельсон өөрийн төрсөн нутаг болох Техасын Абботт тосгонд өнөөдөр ч газар эзэмшиж, аж ахуй эрхэлдэг бөгөөд тэндээ одтой тэнгэрийг харж, тайван амьдрах боломжтой хэвээр байгаагаа онцолсон байна.
Вилли Нельсоны хэлснээр Америкийн хөдөө орон нутгийн үнэт зүйл нь өндөр технологийн үйлдвэрүүд бус, харин гэр бүлийн фермерүүд, жижиг бизнесүүд, өргөн уудам байгаль, үе дамжин хадгалагдсан газар тариалангийн уламжлал юм.
Тэрбээр хүнсний үйлдвэрлэл болон усны нөөц бол улс орны хамгийн чухал баялаг бөгөөд эдгээрийг үйлдвэрийн зориулалтаар золиосолж болохгүй гэж анхааруулсан. Хүнс, усыг хэн хянаж байна, тэр нь ирээдүйд хүмүүсийн амьдралд хамгийн их нөлөө үзүүлнэ гэж үзэж байгаагаа мөн илэрхийлжээ.
