“Ялагчдын цуваа-2026” олон улсын моно жүжгийн наадам энэ сарын 17-нд Улаанбаатар хотноо эхэлнэ. Монголын Моно жүжгийн төвөөс хоёр жил тутам зохион байгуулдаг “Ялагчдын цуваа” олон улсын моно жүжгийн наадам энэ жил 10 дахь удаагаа зохион байгуулагдаж байна.
Нэг хүний жүжиг гэдэг нь нэг жүжигчин тайзан дээр эхлэлтэй, өрнөлтэй, төгсгөлтэйгөөр зөвхөн хөгжим, хувцас, тайз, жижиг хэрэглэлийн тусламжтайгаар ганцаараа өөрийн бие сэтгэл хөдлөлөөрөө тухайн дүрдээ орж бүтэн жүжиг тоглохыг хэлнэ.
Тус наадам нь Монголд моно жүжгийн урлагийг хөгжүүлэх, уран бүтээлчдээ чадваржуулах, олон улсад гаргах, олон улсын уран бүтээлчдийг Монголын үзэгчидтэй холбох зорилготой юм.
Энэ жилийн наадмын нээлтийн тоглолтыг АНУ-ын жүжигчин Хидэр Мэсси өөрийн “HEDY! The Life & Inventions of Hedy Lamarr” бүтээлээр хийхээр Монгол Улсыг зорин ирж байна. Нээлтийн ёслол есдүгээр сарын 17-ны 19:00 цагт болох бөгөөд 19:30 цагаас Хидэр Мэссигийн тоглолт УДЭТ-т үзэгчдийн хүртээл болно.
Наадмын хоёр дахь өдөр буюу есдүгээр сарын 18-нд Сербийн уран бүтээлч Александар Димитриевич “Jealous? Me?!” бүтээлээрээ оролцоно. Түүний тоглолт 19:00 цагт Монгол Улсын хүүхэлдэйн театрт болно. Мөн тус өдөр 20:00 цагаас Хойд Македоны Үндэсний театр Кумановог төлөөлөн оролцож буй Владанка Крстевски “First Person Singular” моно жүжгээ толилуулна.
Харин есдүгээр сарын 19-нд Монголын уран бүтээлчдийн тоглолтууд үргэлжилнэ. 19:00 цагаас Хүүхэд, залуучуудын театрын жүжигчин Р. Янжиндулам “Who Am I?” бүтээлээрээ, 20:00 цагаас Өмнөговь аймгийн Хүүхэд, залуучуудын театрын жүжигчин Б. Ариунтуяа “Desiring My Home” бүтээлээрээ тус тус оролцоно.
Ийнхүү Монгол, АНУ, Серби, Хойд Македоны уран бүтээлчид нэг тайзнаа уулзаж, моно жүжгийн олон улсын уран бүтээлийн туршлага, шинэ хэлбэр, илэрхийллийн арга барилыг Монголын үзэгчдэд хүргэх юм.
“Ялагчдын цуваа-2026” олон улсын моно жүжгийн наадам нь уран бүтээлчид, театрын мэргэжилтнүүдийн уулзалт, туршлага солилцоо, мэргэжлийн харилцааг өргөжүүлэхийн зэрэгцээ Монголын моно жүжгийн урлагийг олон улсын түвшинд сурталчлах чухал арга хэмжээ болж байна.
Наадмын тоглолтуудыг театр сонирхогч, урлагийн салбарын мэргэжилтнүүд болон нийт үзэгчдэд нээлттэйгээр хүргэх юм.
Тус фестивалийг ЮНЕСКО-ын дэргэдэр театр урлагийн институтын моно жүжгийн форум хамтран зохион байгуулдаг ба шүүгчээр моно жүжгийн форумын дэд ерөнхийлөгч Нина Мазур (ХБНГУ), урлаг судлаач Жон Хэ Сүк(БНСУ), УДЭТ-ын найруулагч Э.Билгүүн нар ажиллаж байна.
