Монгол Улсын 21 аймагт урлагийн галерейн сүлжээ байгуулах MOR National Art Gallery Network төслийн эхлэл тавигдаж, анхны галерей энэ сарын 26-нд Төв аймгийн Дэлгэрхаан суманд нээлээ.
“Урлагийн шинэ мөр” НҮТББ-ын мэдээлснээр, энэхүү төсөл мэргэжлийн дүрслэх урлагийг орон нутгийн иргэдэд ойртуулж, хүүхэд залуусын авьяас, бүтээлч сэтгэлгээг хөгжүүлэхийн зэрэгцээ үндэсний өв соёлыг түгээн дэлгэрүүлэх тогтвортой орон зай бий болгох зорилготой юм.
“Чингис хаан” үндэсний музей “Хаадын зам” үйл ажиллагааны хүрээнд Дэлгэрхаан суманд дөрвөн жилийн турш “Хаадын бичээс” уран бичлэгийн үзэсгэлэн, уралдааныг зохион байгуулж иржээ. Үндэсний бичиг соёлын үнэт өв, түүхэн дурсгалаараа онцлог тус сумыг MOR төслийн анхны галерей байгуулах байршлаар сонгож, орон нутгийн соёлын орчныг өргөжүүлэх шинэ эхлэлийг тавилаа.
Нээлтийн ёслолын хамгийн онцгой мөч нь галерейн туузыг Дэлгэрхаан сумын уран бичлэгийн дугуйлангийн есөн хүүхэд хайчилсан явдал байв. Үндэсний бичиг соёлоо суралцаж буй хүүхдүүд ийнхүү өөрсдийн авьяас, хүсэл мөрөөдлөө хөгжүүлэх шинэ орон зайн үүдийг нээлээ. Галерейн анхны үзэсгэлэнд уран бичлэгийн мастеруудын бүтээлтэй зэрэгцэн орон нутгийн хүүхдүүдийн бүтээлийг дэлгэсэн нь багш, шавь нарын ур ухаан, авьяас билгийг нэгэн танхимд нэгтгэж, үндэсний бичиг соёлын өв үеэс үед уламжлагдан үргэлжлэхийн бэлгэдэл болов.
MOR төслийн хүрээнд Монгол Улсын 21 аймагт галерейг үе шаттай байгуулахаар төлөвлөжээ. Ингэхдээ орон нутаг бүрийн түүх, соёлын өв, газар нутгийн онцлогт тулгуурласан өөрийн гэсэн дүр төрхтэй галерейг хөгжүүлж, үзэсгэлэн, сургалт, уран бүтээлчдийн хамтын ажиллагаагаар холбосон үндэсний урлагийн нэгдсэн сүлжээ бий болгохыг зорьж байгаа аж.
Төслийн дараагийн бүтээн байгуулалтын хүрээнд Дэлгэрхаан суманд үндэсний бичиг соёл, уран бүтээлийг бэлгэдсэн 6.6 метр өндөр уран баримал сүндэрлүүлэхээр төлөвлөж, загварыг нь галерейн нээлтийн үеэр олон нийтэд танилцууллаа. Энэхүү бүтээлийн нээлтийг 2027 оны “Хаадын зам” үйл ажилагааны үеэр хийхээр төлөвлөж байгаа юм.
