Бүргэдээр ан хийх уламжлал, нүүдэлчин ахуй, үндэсний зан заншил, өв соёлыг харуулсан уран зургийн үзэсгэлэнг Баян-Өлгий аймгийн музейд нээлээ.
Тус үзэсгэлэнд Монголын Баян-Өлгий аймаг дахь Монголын урчуудын эвлэлийн салбарын зураачдын 20 гаруй бүтээлийг дэлгэжээ.
Баян-Өлгий аймагт 26 дахь жилдээ зохион байгуулж буй “Бүргэдийн баяр”-ын үеэр гаргаж буй үзэсгэлэнд бүргэдийн сүр хүч, эрхэмсэг төрхөөс гадна монголчуудын уламжлал, нүүдэлчин ахуйн онцлогийг харуулсан бүтээлүүд багтсан байна.
Үзэсгэлэнг Баян-Өлгий аймгийн Засаг даргын Тамгын газар, Соёл, урлагийн газар, Музейчдын клуб болон Монголын Урчуудын эвлэлийн аймаг дахь салбар хамтран гаргажээ.
Энэ сарын 8-ныг хүртэл үргэлжлэх үзэсгэлэнд МУСТА, зураач, уран барималч Р.Нурдыхан, Х.Дастан, А.Хайрат нарын долоон уран бүтээлчийн бүргэдээр шувуучлахуй, нүүдэл суудал, нүүдэлчдийн ахуй амьдралыг харуулсан бүтээлүүдийг дэлгэжээ.
Үзэсгэлэнгийн талаар МУЭ-ийн тус аймаг дахь салбарын тэргүүн, зураач барималч А.Хайратаас тодруулахад, “Манай МУЭ-ийн Баян-Өлгий аймаг дахь салбарын зураачдын энэ жилийн ээлжит бүргэдийн баярыг тохиолдуулан зохион байгуулж байгаа “Тэнгэрийн эзэд” нэртэй үзэсгэлэнгээ нээж байна. Энэ удаагийн үзэсгэлэнд манай МУЭ-ийн гишүүн, ахмад зураач Р.Нурдыхан, Ж.Ризабек, Н.Оразбек, Н.Тилеугабыл, А.Харатышхан Н.Өскенбай болон миний бие нийлж 20 гаруй бүргэдчин шувуулахуй, нүүдэлчдийн амьдралыг харуулсан 20 гаруй уран бүтээлээр энэхүү үзэсгэлэнд оролцож байна. Энэ удаагийн үзэсгэлэнгийн онцлог шинэ бүтээлээр зураач, барималч Ж.Ризабекийн “Нүүдэл” бүтээл шалгарч байна. Үзэсгэлэнг гадаад-дотоодын жуулчид төдийгүй аймгийн нийт иргэд, хүүхэд залуучууд хүрэлцэн ирж сонирхоосой, энэ үзэсгэлэнгээр нүүдэлчдийн амьдрал ахуй, нүүдлийн соёл, бүргэдээр ан хийх ёсон зэргийг харуулахыг оролцогчид зорьсон” хэмээв.
