Blue moon арт галерейн гишүүн уран бүтээлч Ц.Солонго-ын “СЭТГЭЛ ШУВУУ” уран бүтээлийн анхны бие даасан үзэсгэлэн 2014.10.13-22-ны хооронд дэлгэгдэж та бүхний оюуны мэлмийг баясгах гэж байна. Үзэсгэлэнгийн нээлт 2014.10.13-ны 18:00 цагт болно
Уран бүтээлч хэлэхдээ урлаг нь хүнийг биологийн зүйлүүдээс ялгаж зааглан, энэ ертөнцийг өөрсдийнхөөрөө бүтээх нөхцөлийг өдөөж байдаг. Энэ бүх зүйл хаанаас цацарч байгааг эх булаг руу нь сонирхвол гарт баригдашгүй, хязгаарлашгүй, хөдөлгөгч хүч бол сэтгэл. Сэтгэлийг гэрэлтэй зүйрлэвэл гэрэл хаа ч хүрч цацран гийгүүлэхийг бид таашгүй. Харин тэр гэрлийг бодит амьтнаар илэрхийлбэл ШУВУУ. VI-зууны үед хүмүүс галбингаа гэдэг домгийн шувуугаар дотоод сэтгэлийн хүсэл эрмэлзлэлийн элч болгон галбингааг диваажинд аваачих шувуу хэмээн үздэг байсан нь тоомжиргүй хандаж болмооргүй СЭТГЭЛГЭЭ юм.
Тиймээс ч уран бүтээлч Ц.Солонго сэтгэл доторхи шувуугаа өөрийн бүтээлээрээ идэрхийлэн урлагт хайртай та бүхний зүг сэтгэл шувуугаа нисгэж байна. Түүний бүтээлүүдэд эрчлэг хирнээ зөөлөн хэмнэлтэй сэтгэлийн олон хэлбэлзлүүд нэгэн шугаманд нэгдэж амьдралыг магтан дуулах тэр дуудлага руу хөтлөгдөх мэт хэлбэр дүрсүүд ажиглагдана.
Уг үзэсгэлэнд хүний нүдэнд үл харагдах илүү мэдрэмжүүдийг “Нүд”-ээр бэлгэдэн илэрхийлж, элемент болгосон энгийн байгалийн өнгийг материалтай хослуулсан бүтээл болох арьс, монотип, уран бичлэгийн техникээр бүтээгдсэн 30 гаруй бүтээл дэлгэгдэх гэж байна.
Уг үзэсгэлэн 2014 оны 10-р сарын 13-22-ны хооронд “Blue moon” арт галерейн үзэсгэлэнгийн танхимд үргэлжлэх бөгөөд дэлгэрэнгүй мэдээллийг 96426696, 88850812, 89806021 дугаарын утсаар лавлана уу. Та бүхнийг хүрэлцэн ирэхийг урьж байна.
www.URLAG.mn
