Чамтай учирахад өвөл байсан хайрт минь
Чимээгүй догдлох зүрхний хэмнэл эвдсэн учрал
Уйдах завгүй залуу насны дурсамжинд мөнхөрсөн
Ухаангүй дурлалын мөр үлдээсэн амраг минь…
Хамтдаа зүтгэх хүсэл их байсныг мэднээ
Харамгүй ихээр хайрлаж байсныг чинь ч мэднэ
Харин би чинь хэн ч биш байсан болохоор
Хагацах замыг чамаас сонгосон нууцхан минь…
Чамайг гаргаж өгөх гээд нисэх буудал дээр
Чангаар тэврэн салахдаа нулимсаа тэвчиж
Духаа өгөн үнсүүлэхдээ сүүлчийнх байсныг
Дурсгалын дэвтэр дээр чинь бичээд урсан…
Энд бороо орж байна шиврээд л шивнээд л
Эрх нь дэндсэн миний зүрхэнд зүсрээд л
Чамайг гомдоосон өдөр бороо шаагиж байсан
Чив чимээгүйгээр чи уйлж суусан сэтгэлдээ…
Аргадаж учирлавч чи ойлгохыг хүсээгүй ээ
Аргагүй дээ би ухаарч байна буруутгахгүй
Үзэн ядаж харахыг хүсэхгүй байгаагаа хэлж
Үзэг цаасны минь ирийг мохоосон дурдатгал…
Гэвч амьдрал баялаг гэдгийг ойлгуулсан
Гэргий болох хүнээ чи минь сонгосон
Үрээ тэврэх одоо та минь хүүгийн аав
Үргэлжлэх амьдралыг тань түрэх далайн түрлэг…
Аз жаргал хаалгыг минь харамгүй тогшиж
Атаархмаар зүйлийг надад бэлэглэсэн
Хүн чанараа гээгээгүй мөн чанарын минь хариуд
Хүмүүсийн хүсэл бүхнийг шингээж уусгасан…
Намрын бороо шаагих нь нулимс шиг юм гээч
Нүд тороод байна үзгээ уйлуулж дэвтрээ норгоё
Нэг насны амьдралд тань аз жаргал ерөөж
Нэрээ нууцлан шүлэг тэрлэе ганцхан чамдаа…
www.URLAG.mn
