Чамайг бодож сэтгэл гэгэлзэнэ
Чиний тухай бодолд үерлэнэ
Чин сэтгэл минь чамайг л үгүйлж
Чанх дэргэд минь байвч би чамаар л дутна
Бодолд минь чиний тухай дурсамж
Борооны үүл шиг хуран цуглаж
Борхон зүрхэнд минь шиврэн зүсрэхэд
Бие сэтгэл минь чамаар л дутна
Ганцаардал дунд бодол минь намайг эзэмдэнэ
Ганцхан чи бодлыг минь эзэгнэнэ
Ганцаараа байгаагаа ухаарахад
Газар дэлхий дээр би чамаар л дутна
Хөврөн урсах чиний тухай бодлууд
Хоног өдрийн уртад улам бэхжиж
Хүсэл мөрөөдөлд минь чи ирэхэд
Хайрын нандин сэтгэл минь чамаар л дутна
Тэнгэрлэг хайрын минь эзэн
Тэнгэрийн дагинастай зүйрлэм үзэсгэлэнтэй
Түгэн гялалзах одод шиг мишээх
Танхилхан бүсгүй минь би чамаар л дутна
Эгэлхэн миний зүрхийг эзэмдсэн
Энхрий бүсгүй чамаар л дутна
Энэхэн хорвоод чамгүй амьдрах юм бол
Энэ л насаараа би чамаар дутна
