Хархорум хотын туурийг дэрлээд хэвтэх чулуун мэлхийг хараад Өвөр Монголын Төрийн шагналт яруу найрагч Л.Одсэрийн бичсэн шүлгийг толилуулж байна.
Өвөр Монголын Жирэмийн чуулганы Дархан хошууны Зоригт вангийн хороонд төрсөн “Л.Одсэрийн утга уянгын товчоо” (5 боть) номыг залж авчирлаа. Л.Одсэр бол Төрийн шагналт яруу найрагч бөгөөд Дундад Улсын Зохиолчдын эвлэлийн гишүүн, Гавьяат найруулагч, соёлын гавьяат зүтгэлтэн юм.
Тэрбээр 2006 онд Их Монгол улсын нийслэл хотод хөл тавиад Хархорум хотын туурийг дэрлээд хэвтэх чулуун мэлхийг хараад энэхүү шүлгийг тэрлэжээ.
ТӨРИЙН МЭЛХИЙ
Ганц чулуун мэлхий
Гал нь унтарсан бууцныхаа
Газарт булагдсан үнсийг дарж хэвтэнэ
Гантиг чулуун амь
Гамгүй Монголыг харж хэвтэнэ
Төө чинээ ч ёгож чадахгүй
Төрийн мэлхий
Түмний нүдэнд хэвтэнэ
Дээр нь алгаа тавихад
Дэлхийн зүрх доор нь түг түг цохилох шиг
Дэргэд нь малгайгаа дэрлээд хэвтэхэд
Дээдсийн маань хөлийн чимээ тасар тасар сонстох шиг…
Нүдэнд нь тэнгэрийн нулимс эргэнэ
Нүүдэлчний тэнгэр
Нулимсанд нь эргэнэ…
2006.07.12
