Энэ зуны хамгийн том давалгаа Унадаг дугуйтай Улаанбаатар байлаа. 80 настай буурлаас 8 настай балчир хүртэл унадаг дугуй унаж, төрийн болоод бизнес эрхлэгч костюм өмсөж зангиа зүүсэн залуус унадаг дугуйгаар ажилдаа явж, аав нь нялх хүүхдээ цэцэрлэгт нь хүргэж өгөхдөө унадаг дугуйгаар явж, гоо сайхан төгс галбирыг эрхэмлэдэг бүсгүйчүүд унадаг дугуйгаар ажлаа амжуулж, оюутан сурагчид хичээлдээ явахдаа унадаг дугуй унаж цэвэр агаар, эрүүл уушигтай сайхан зун болж өнгөрлөө.
Саяхан унадаг дугуйн парадны, мөн аяллын намрын хаалтын үйл ажиллагаа болж 1000 гаруй залуучууд идэвхтэй оролцож дараа жилийн хавар хүртэл баяртай хэмээн дугуйндаа хэллээ. Монголд 3-р сараас 11-р сар хүртэл дугуй унах боломжтой гэсэн судалгаа гаргасан нээрээ энэ жил бүтэн 9 сар унадаг дугуй уналаа. Монголын Залуучуудын Холбоо нүдээ олсон, нийгмээ мэдэрсэн зөв аяныг эхлүүлж, зөв уриалгыг залуусын дунд дэлгэрүүлж хэдий мөнгөгүй ч гэсэн мөнгөөр бялхасан төр засгийн хийдэг ажлаас илүү яг энэ цаг үед хийгдэж байгаа үр дүнтэй бодит ажил болоод байна. Googleдээрх хандалт нь хүртэл нэмэгдэж 6 сарын хугацаанд 400 мянга хол давж, мянга мянган залуучууд холбогдож нэгдэх хүсэлтээ илэрхийлж байгаа ажээ.
