Blue Moon арт галерейн гишүүн уран бүтээлч Э.Гансүхийн “Зүүдлэгдээгүй зүүд” уран бүтээлийн бие даасан үзэсгэлэн 2014 оны 11 сарын 17-27-ны хооронд Blue Moon арт галерейн үзэсгэлэнгийн танхимд дэлгэгдэх гэж байна.
Уран бүтээлч Э.Гансүх 2005 онд ДУДэСургууль монументаль уран зургийн ангийг төгсөж түүнээс хойш идэвхитэй уран бүтээлээ тууривасаар яваа бөгөөд 2010 оноос ШУТИС-н ҮТДС-н Дизайны ахлах сургуулийн уран зургийн багшаар ажиллаж ирээдүйн уран бүтээлчдийг бэлтгэх их үйлсэд зүтгэж яваа уран бүтээлч юм.
Тэрээр 10-гаруй жилийн өмнөөс морины шинжийг судлах судалгаагаа эхэлсэн бөгөөд түүний судалгааны үр дүн уран бүтээлд нь амилан хамгийн энгийн хэлбэр дүрс, тодорхой бэлгэдэл өгүүлэх мэт өнгийг сонгож, бүтээлийн агуулгыг хэт чамирхан тоочихгүйгээр гол санааг үзгчидтэй ярилцах мэтээр бүтээлдээ тусгажээ.
Түүний бүтээлүүдийн гол сэдэв нь монгол түмний бахархал болсон Хүлэг эрдэнэ юм. Тухайлбал “Хүлэг эрдэнийн шүтээн”, “Босоо хийморь”, “Шүтээн”, “Онгод залрахуй” бүтээлүүдээс морьтон монголчуудын гүн ухааныг дүрслэх урлагийн хэлээр илэрхийлэн уламжлалт шүтээн зургийн зарчим болоод бэлгэдэл зүйн цогц шийдлийг дүрслэх урлагийн томоохон төрөл болох минимализм урсгалтай хослуулсанаар судалгаан дээр тулгуурлаж хийгдсэн бүтээл болжээ.
“Зүүдлэгдээгүй зүүд” үзэсгэлэн нь зүүдний ертөнцөд өнгөрсөн одоо, ирээдүй үл хязгаарлагддаг учир өмнөх үеийн өвөг дээдсийн монголч сэтгэлгээг дүрсэлсэн 30 гаруй бүтээлүүдийг энэ үзэсгэлэнгээрээ дэлгэжээ.
Хүлэг эрдэнийн шүтээн дагасан уран бүтээлчийн зүүдлэгдээгүй зүүдийг хамтдаа зүүдэлцгээе.
Үзэсгэлэнгийн нээлт: 2014 оны 11 сарын 17-ны 18:00 цагт болно. Урлагт хайртай та бүхнийг хүрэлцэн ирэхийг урьж байна.
Уг үзэсгэлэн 2014 оны 11-р сарын 17-27-ны хооронд “Blue moon” арт галерейн үзэсгэлэнгийн танхимд үргэлжлэх бөгөөд дэлгэрэнгүй мэдээллийг 89806021, 88773410 дугаарын утсаар лавлана уу.
