Ховд нутгаар овоглосон авъяаслаг уран бүтээлчдийн хамтарсан “Ховд нутгийн дуулал 2014” тоглолт Монгол бөхийн өргөөнд болно. Тус тоглолтыг Улаанбаатар хот дахь Ховд аймгийн залуучуудын холбооны залуус санаачлан зохион байгуулж байгаа бөгөөд Ховд нутгийн зон олон хамтдаа нэгэн үдшийг өнгөрөөх боломжийг бий болгохын зэрэгцээ сумдынхаа залуучуудын холбооны үйл ажиллагааг дэмжих зорилготой ажээ. Тоглолтод Улаанбаатар хотод ажиллаж, амьдарч, сурч хүмүүжиж байгаа оюутан залуучууд болон Ховд нутгийнхаа нэрийг урлагийн алтан тайзнаа дуурсгаж яваа үе үеийн уран бүтээлчид оролцож ая дуугаа өргөх юм байна. Дашрамд сонирхуулахад тоглолтын тасалбарыг мэдээллийн лавлах 1900-1950 үнэгүй хүргэж өгч үйлчилж байгаа аж.
Тус тоглолтын талаар Ховд нутгийн сүлд дуу “Тунгалаг буянт”-ыг амилуулж ард түмнийхээ сэтгэлд хоногшсон Ардын жүжигчин Б.Зангад гуайгаас тодрууллаа.
–Сайн байна уу. Таныг “Ховд нутгийн дуулал 2014” тоглолтод оролцохоор болсон гэж сонссон. Тоглолтын талаарх сэтгэгдлээсээ хуваалцахгүй юу?
-Ховд нутгаараа овоглосон зон олонтойгоо нэгэн дээвэр дор цуглаж, ая дуугаа өргөн нэгэн үдшийг өнгөрөөх болсондоо баяртай байна. Нутгийн ахан дүүсийнхээ эрч хүч энергиэр цэнэглэгдсэн сайхан тоглолт болно гэдэгт итгэлтэй байгаа.
-Ховдчууддаа ямар ямар уран бүтээлээр бэлэг барих бодолтой байна вэ?
-Мэдээж нутгийнхаа тухай сайхан дуунуудаасаа дуулж бэлэг барина. Миний хувьд нутгийн зон олонтойгоо уулзалгүй нэлээд удчихлаа. Олон жил сэтгэлдээ тээж явсан нутгийн ахан дүүсийнхээ халуун дулаан алга ташилтыг дахин сонсох болсондоо маш их баяртай байна.
-Тоглолт сумдын залуучуудын холбооны үйл ажиллагааг дэмжих зорилготой гэсэн. Энэ талаар тодруулбал?
-Зорилго нь надад маш зөв санагдсан. Яагаад гэхээр сумдын залуучуудын холбооны үйл ажиллагааг дэмжинэ гэдэг нь тэдний цаана байгаа мянга мянган оюутан залуусын ирээдүйд үнэтэй хувь нэмэр оруулж байна гэсэн үг. Бид тэр болгон оюутан залуусдаа туслаад байж чаддаггүй тийм ч учраас ирээдүй хойч үе болсон оюутан залуучуудынхаа сурч боловсрох, ирээдүйн сайн сайхны төлөө нийслэлд ажиллаж амьдарч байгаа ховдчуудыгаа энэ сарын 29-нд Монгол бөхийн өргөөнд цуглаасай гэж би хүсэж байна. Мөн энэ сайхан тоглолтыг санаачлан зохион байгуулж байгаа Улаанбаатар хот дахь Ховд аймгийн залуучуудын холбооны залуусдаа бас баярлалаа гэж хэлмээр байна.
www.URLAG.mn
