-Юуны өмнө таны цорын ганц шавийн тань анхны бие даасан тоглолт өнөөдөр болж байна. Таны хувьд шавьдаа ямар дүн тавих вэ?
-За би хэрвээ дүн тавих бол 85 оноо буюу В гэсэн үнэлгээ өгнө. Тэгэхдээ улсын филармонид дөрвөн жил ажиллана гэдэг их том туршлага болж байгаа юм. Насаа маань өөрөө СУИС-ын эстрад дууны ангийг маш сайн дүнтэй төгссөн. Тэр ч утгаараа нүүр улайлгасангүй. Мэдээж анхных учраас сандрах, бага сага алдаа гаргах зүйл байгаа.
Гэхдээ санаа нь маш сайхан болсон. Дээрээс нь дэмжиж тусалсан байгууллагууд байна. Энэ бүхний хүчинд үнэхээр дажгүй боллоо. Хамгийн гол нь Насаа маань өөрөө бүх юмандаа гүйсэн. Би бол зүгээр дуугаралтыг нь л сонирхоно. Анхны тоглолт дээр заавал ямар нэг факт гардаг гэтэл нэг ч факт гаргалгүй тоглосон болохоор би шавиараа үнэхээр бахархаж байна. Шавийг минь дэмжсэн Apple продакшн, Улсын филармони, Баян Монгол чуулга, Урлах эрдмийн дээд сургуулийн дизайнерууддаа баярлалаа гэж хэлмээр байна.
Ер нь бол залуу дуучид нэг сайхан клип хийгээд л тодроод байдаг болсон. Харин миний шавь үнэхээр чансаатай амьд тоглолт хийлээ. Би бол үнэхээр юунд нь ч оролцоогүй. Насаа маань өөрөө өдий дайны тоглолт хийх туршлагатай болчихсон байсан. Уг хүн нь өөрөө их биеэ даасан дайчин хүн л дээ. Миний хувьд үнэхээр сэтгэл хангалуун байна.
О.Туяа
