МУЭ-ийн нэрэмжит шагналт зураач, багш Д.Булгантуяагийн “Нээлттэй урлан-3” бие даасан үзэсгэлэнгийн нээлт өнөөдөр МУЭ-ийн Арт үзэсгэлэнгийн танхимд болно. Үзэсгэлэнд түүний судалбар зураг, хөрөг, дүрслэлийн бодит бус аргаар илэрхийлсэн хийсвэр сэтгэлгээний 55 бүтээлийг дэлгэх юм. Зураачийн бүтээл нь Монголын орчин үеийн дүрслэх урлагт томоохон байр суурийг эзэлдэг бөгөөд уран зургийн арга ажиллагаанд шинэлэг уур амьсгал, хэллэг оруулж өгснөөрөө онцлогтой юм.Тэрээр хөрөг, байгалийн үзэсгэлэнг хослуулан реалист арга барилаар чадварлаг зурж дүрсэлдэг нь бүтээлүүдээс нь тодорхой харагдана. Мөн өөрийн гэсэн хийсвэр сэтгэлгээтэй, өвөрмөц арга барилтай зураач юм.
Тэрээр 1999 оноос дотоод, гадаадын томоохон үзэсгэлэнд бүтээлүүдээрээ тогтмол оролцож иржээ. 2003 онд Дүрслэх урлагийн музейд “Бодлын салхи”, 2004 онд Болгарын ЭСЯ-нд “Color”, 2006 онд Японы Кофу хотод “Now here 2006”, Нагоя хотод “Asian origin” бие даасан үзэсгэлэн, 2008 онд Хаан банкны ART галерейд “Хаврын эхэнд” уран бүтээлийн үзэсгэлэн, 2012 онд МУЭ-ийн Арт галерейд “Цагийн өнгө” хамтарсан үзэсгэлэн, 2006, 2013 онд МУЭ-ийн Арт галерейд “Нээлттэй урлан-1”, “Нээлттэй урлан-2” уран бүтээлийн бие даасан болон хамтарсан үзэсгэлэнгээ гаргаж байжээ.
Түүнчлэн жил бүр уламжлал болон зохион байгуулдаг “Оны шилдэг уран бүтээлийн үзэсгэлэн 2012”-д оролцож “Зохиомж” уран зургийн бүтээл нь шалгаран улсын сан хөмрөгт оржээ.
www.URLAG.mn
