Ганцхан чамд л зориулах шүлгэн цацал
Сэтгэлийг минь дулаацуулах юм аа
Гал халуун зүрхний ганцхан мөрөөдөл
Сэмхэн бодолд минь тунарах юм аа
Чамайгаа би санаж байна…,
Чиний оршин байх зүгт сэтгэлээ нисгэж
Чимээгүйхэн дэргэд чинь очих юм сан
Чамаар л хайрлуулах ганцхан хүсэл
Чамин оршихуйг минь мөнх чимх юм аа
Чамруугаа би тэмүүлж байна…,
Итгэл бэлэглэж, сэтгэл уяраасан
Инээд сөгнөж, жаргал амтлуулсан
Ирмэх харцанд чинь талимааран
Ичимхий зангаа чиний өмнө гээжээ
Ирмүүн бодолд өнжих баясал минь ээ.
Цагаар хэмжигдэх хүний орчлонд
Жилээр урсах хайрын мананд
Цаглашгүй их хүслийн минь оргил
Жим даган жамаар учирсан учрал
Булиглах зүрхэнд ганцаар тодорсон
Буйдхан амьдралд чамайг л би санана.
Болзоо тавин хүлээвч эзэнгүй учрал
Босго алхан гэртээ оровч хоосон өрөө
Бодолд дарагдан хэвтэвч ганцаардсан сэтгэл
Болоогүй учралын манан дунд
Дэндүү эрт чамтайгаа учирчихжээ…
Шүлэгч Шувуухай
