 |
Аагитай архинд согтууран
Аархаж буй догь эр
Аальгүй охидод тэнхээрхэн
Дайлж буй баян гар
Тойрч суусан хүүхнүүдээс
Тоочиг алдан маасганана
Тоож харахгүй байхад нь
Тоох ч юмгүй мунаглана
Хөхрөн инээх охидын магтаалд
Хөөрч буй бэлтэй эр
Хөлсны үнэртэй буудлын өрөөнөөс
Хөөргөө алдсан ч гудиггүй эр
Хөлдүү мах зарж олсон
Хөх ногоон Чингис авугайг
Хөхөндөө парлонтой нүдэндээ линзтэй
Хөөрхөн охидод үрж тараана
Арьс үс арилжиж олсон
Аравт хорьтийн нүнжигтэй дэвсгэртийг
Булбар ялдам засварт орсон
Будмал охидод үрж тараана
Мөнгө нь дуусах алдад
Мөөмөө бариулах нь юу л бол
Мөлгөр тархитай шар залуу
Эхнэртээ юу гэж хэлнэ дээ
Байгаа төгрөгтөө тааруулан
Бааранд ороод баярхана
Балай хэдэн хүүхнүүдэд
Байдаг хэдээ шавхана
Буудалд орохын даваан дээр
Бултаж новшрох сэгсгэрүүдэд
Мал наймаалсан цаасаа сэгсэрүүлсэн
Мань эр уй гашууд автав
Б.МӨНХ-ОРГИЛ
2016.11.18-нд
