“Яг түүн шиг” шоуны бүжиг дэглээч, хөдөлгөөний найруулагч Т.Саруултөгс шоуны оролцогчид болох Б.Нацагдорж,О.Тэмүүжин Г.Сүндэрмаа, Ц.Тэмүүлэн нарын талаар ийн ярьжээ.
Хөдөлмөрч зан нь надад их нөлөөлж байгаа
Б.Нацагдорж буюу Наки ах маш хичээнгүй. Би продюсер хүн, энэ дууг чинь би зохиодог юм гэсэн ямар ч онгироо зан байхгүй. Яг л суралцагч шиг байдаг. Бүжгийн бэлтгэлдээ орж ирээд л бэлдээд байдаг, бэлдээд л байдаг. Наки ах бага зэрэг махлаг. Миний ажигласнаар тиймэрхүү жинтэй хүмүүс “Би тарган учир муухай харагдана. Би яаж залуу хүүхдүүдийг барах вэ дээ” гэсэн хандлагатай байдаг. Гэтэл Наки ах тийм биш. “Би үзүүлээд өгнө. Чадна”,”Алив заагаад өг” гэсэн дайчин чанартай. “Танд амархан дэглэлт тавиад өгье” гэхээр “Үгүй. Та нар хийдгээ хий. Би сурмаар байна” гэдэг. Тайзан дээр гарахаараа зааланд бэлдэж байснаасаа илүүг үзүүлдэг. Тайзнаа гарахын өмнөх орой нь бараг унтдаггүй юм шиг байгаа юм. Хөдөлмөрч зан нь надад их нөлөөлж байгаа. Тэр хүнээс сурах юм их байна
Ард түмний дунд өөрийгөө тамгалах хэмжээнд танигдсан хөдөлмөрч хүн
О.Тэмүүжин буюу Тэмка ахад бурхнаас өгсөн авьяасыг би л лав үгүйсгэж чадахгүй. Бүжгийн зааланд орж ирэхээр нь 16 тоотыг үзүүлэхэд л “Аяа тавь” гэдэг. Нэг хараад л сурчихдаг. Бүжигчин, дуучин, жүжигчин хүн болохоор тэр байх. Өөрийнхөө продакшны бүхий л найруулга, маркетинг хийгээд явчихдаг, бүх тал руу төгс хөгжчихсөн. Яахын аргагүй ард түмний дунд өөрийгөө тамгалах хэмжээнд танигдсан хөдөлмөрч хүн.
бүжиг зааж байхдаа түүнийг дагаж баярлаж, огшдог
Харин Г.Сүндэрмаа эгчийн хувьд “Sweetymotion” хамтлагтайгаа АНУ-д удчихсан туршлагатай уран бүтээлч. Сэтгэл хөдлөлийн хувьд их гадагшаа. Бүжгийн ямар ч тавилтыг маш их сэтгэл хөдлөлтэйгөөр хүлээн авдаг. Их эрч хүчтэй. Тэр нь ч бидэнд нөлөөлж бүжиг зааж байхдаа түүнийг дагаж баярлаж, огшдог.
Толины өмнө ганцаараа бүжгээ давтаад зогсож байдаг
Ц.Тэмүүлэн ах бусад үед чимээгүй. Бүжиглэх дургүй байгаа юм уу, эсвэл бидэнд дургүй байгаа юм болов уу гэж бодогдохоор. Гэхдээ огт тийм биш. Тэр хүний байгаа нь л тэр. Бэлтгэл нь дуусаад хоёр, гурван цаг өнгөрч байхад ч яваагүй, толины өмнө ганцаараа бүжгээ давтаад зогсож байдаг. Энэ мэтээр оролцогч болгон өөр өөрийн гэсэн онцлогтой.
Э.Бурам
