Өчигдөр Соёлын бүтээлч үйлдвэрлэлийн салбартай холбоотойгоор хийсэн судалгааны талаар танилцуулах цахим хурал, уулзалт боллоо. Энэ үеэр “MMCG” компанийн судалгаа хөгжил хариуцсан захирал Ч.Даваасүрэн соёлын бүтээлч үйлдвэрлэлийн салбарын чанарын судалгааг танилцууллаа.
Тэрээр, Соёлын салбар бол тухайн улс орныхоо батлан хамгаалах салбартай адил юм. Өв уламжлалаа хамгаалах, гаднын улсад соёлоо сурталчлахад соёлын бүтээлч үйлдвэрлэлийн салбар чухал. Энэ нь мөн эдийн засагт тодорхой нөлөө үзүүлэх нэг хүчин зүйл юм. Үүнийг нэгдсэн байдлаар хөгжүүлж чадвал эдийн засгийн чухал алхам болно. Энэ салбар хөгжсөнөөр жуулчдыг татах, гаднын улсад өөрсдийгөө таниулах боломжтой хэмээсэн юм.
Соёлын бүтээлч үйлдвэрлэлийн салбарт хамаарах 12 чиглэлийг танилцуулав. Үүнд:
- Өв соёл
- Утга зохиол, ном хэвлэл
- Дүрслэх урлаг
- Дуу хөгжим
- Тайзны урлаг
- Кино, дуу дүрсний урлаг
- Хувцас загвар
- Архитектур, интерьер
- Дизайн
- Дижитал дизайн, контент
- Маркетинг, брэндинг, коммуникаци
- Хэвлэл мэдээлэл, телевиз, радио багтана.
Соёлын бүтээлч үйлдвэрлэлийн хөгжлийн суурь зарчмыг дараах 4 чиглэлээр авч үзжээ. Үүнд:
- Байгалиа дээдэлсэн тогтвортой хөгжлийг эрхэмлэх
- Тэнцвэртэй, тасралтгүй хөгжүүлэлтийг дэмжих
- Тэгш оролцоог хангах
- Дэлхийн стандартад нийцүүлэх
