МУГЖ, Төрийн соёрхолт Д.Сосорбарам сүүлийн үед дэлгэцийн бүтээлд төдийлөн оролцохгүй байгаа ч тун удахгүй нээлтээ хийх “Аравт” кинонд дүр бүтээсэн юм байна.
“Атга нөж” жүжгийн Чингис хааны дүрийг бүтээснээс нь хойш түүнд ихэнхдээ түүхэн киноны санал ирэх болсон ч сүүлийн үеийн киноны зохиолууд төдийлөн таалагдахгүй байгаа учир тэрээр одоохондоо ямар нэгэн кинонд тоглохгүй гэж шийджээ. Тэрээр өнгөрсөн хавар нэгэн нэвтрүүлэгт оролцохдоо “Б.Лхагвасүрэн ах маань Чингис хаантай адилхан болоод л, би Б.Лхагвасүрэн ахтайгаа адилхан болоод л…” хэмээн ярьж байсан. Учир ч түүнийг үс сахлаа ургуулаад ирэхээр Б.Лхагвасүрэнтэй андуурах явдал цөөнгүй гардаг гэнэ. Харин саяханаас тэрээр “захиалгаар” сахлаа ургуулж эхэлжээ. Энэ тухайгаа тайлбарлахдаа “Би Б.Лхагвасүрэн ахтайгаа адилхан болох гээд ингээд сахлаа ургуулаад байгаа юм биш л дээ. Саяхан Камертоны Д.Болд намайг Со ахаа та сахлаа ургуулж байгаарай гэж даалгавар өгсөн. Нэг шинэ уран бүтээл хийх гэж байгаа. Түүнд нь миний сахалтай царай хэрэг болох юм гэсэн” хэмээн хошигнон ярьсан юм. Тиймээс тун удахгүй Д.Болдын нэгэн шинэ уран бүтээлийг Д.Сосорбарам гавъяат “чимэх” юм байна.
Н.Хувьзаяа
