A Cool – ийн тоглолт 9 сард болно.

Уянгын хайрын дууг амилуулсан дуучин A Cool буюу Б.Анхбаяртай ярилцлаа.
-Саяхан наадам болж өнгөрлөө. Сайхан наадав уу?
-Сайхан наадлаа. Наадам гэдэг гэр бүлээрээ сайхан баярладаг уламжлалт баяр. Миний хувьд ч гэсэн гэр бүлтэйгээ наадамлалаа. Гэхдээ үүний хажуугаар тоглолттой байж таарлаа. Эрдэнэтийн наадамд очиж ая дуугаа өргөсөн. Мөн Их хотын үдэш зэрэг тоглолтуудад оролцсон.
-Сүүлийн үед ямар уран бүтээл дээр ажиллаж байна вэ?
-Сая “SBN” телевизээс зохион байгуулсан “Манай аялгуу” гээд төсөл хэрэгжсэн. Шинэ үеийн залуус хуучны алтан үеийн дуучдынхаа дууг сэргээж дуулсан. Миний хувьд “Цэцэгчний хүслэн” гэж дууг дахин сэргээж дууллаа. Тэр нэвтрүүлэг “SBN” телевизээр гарсан. Яг одоогоор “Чиний тухай” гэж дуун дээр клип хийж байна. Зураг авалтандаа орчихоод явж байна. Удахгүй клипээ цацна. Үүний дараа дахиад нэг дууны клипний ажилтай. Удахгүй бас гадагшаа тоглолтод явах гээд бэлтгэлээ хангаад байж байна.
-Анхны цомгоо гаргах гэж байгаа гэж сураг дуулдаад байсан?
-Тийм. Анхны цомгоо гаргах гээд ажиллаж байгаа. Ерөнхийдөө доторхи дуунууд нь бэлэн болчихсон. Хэвлэлтийн ажил үлдээд байна. Герман, Солонгос хоёрын аль нэгэн рүү хэвлэлтэд өгөх гээд л сонгох гээд байна. Анхны цомог гэдэг утгаараа чанартай зүйл хийх гээд хэвлүүлэх орноо хүртэл сонгохдоо хариуцлагатай хандаж их сайн бодсон. Герман технологичид сайн гэдэг утгаараа тийшээ явуулах гээд л байна даа.
-Цомогт дандаа уянгын дуу багтаж байгаа юу?
-Ерөнхийдөө уянгын талдаа дуу 80-аад хувь нь багтаж байгаа. Өмнө нь хүмүүст хүрсэн “Зөөлөн хайр”, “Аниргүй итгэл”, “Энхрий”, “Хайртай бол эргэж хараарай” зэрэг дуунууд багтсан. Мөн үүнээс гадна цомгийн 30-аад хувь нь транс, R and B зэрэг чиглэлийн шигтгээ дуу ч багтсан байгаа.
-Тоглолт хийх бодол бий юу?
-Тийм. Бас нэг төлөвлөгөө гэвэл есдүгээр сард анхны тоглолтоо хийхээр ярилцаж байгаа. “UB palace”-ын  “Open air” задгай талбайд хийх төлөвлөгөөтэй байгаа. Задгай талбай том гэдэг утгаараа олон хүнийг хамруулсан нүсэр сайхан тоглолт хийе гэж бодсон.