"B Production", "Боловсрол" суваг телевиз хамтран өнгөрсөн 12 дугаар сараас эхлэн ард түмнийг байлдан дагуулах, урт хугацаанд мэргэжлийн түвшинд оршин тогтнох авьяас чадвар, эрч хүч, эв нэгдлээр дүүрэн цоо шинэ хөвгүүдийн хамтлаг байгуулах зорилгоор "Камертон-2" шоу төслийг санаачлан зохион байгуулсан билээ. 15-25 насны 760 гаруй залуус хамрагдсан уг шоу дөрөвдүгээр шатны байдлаар шилдэг 16 оролцогчыг авч үлдээд байна. "Камертон-2" шоуны зохион байгуулагчид болон шүүгчид болох "Камертон" хамтлагийнхан шилдэг 16 оролцогчдыг өнөөдөр хэвлэлийнхэнд танилцуулж, шоу цаашид юу хийхээр төлөвлөж буйгаа мэдээллээ.
Шилдэг 16 оролцогч залуус хамгийн сүүлийн буюу финалын шатдаа "Камертон" хамтлагийн дөрвөн гишүүний удирдлаган дор дөрөв хуваагдаж жинхэнэ мэргэжлийн хамтлагийн түвшинд бэлтгэл сургуулилтаа хийж эхэлжээ. Хурлын үеэр "Камертон" хамтлагийн дөрвөн гишүүн өөрсдийн удирдлаган дор авсан багаа танилцуулсан бөгөөд оролцогчдыг дөрөв дөрвөөр нь хамтлаг болгон дараагийн шатанд нь бэлдэж байна. Мөн энэ үеэр төслийн багийнхан шилдэг 16 оролцогчтой хоёр сарын хугацаанд ажиллах албан ёсны гэрээ хийсэн гэдгийг мэдэгдэв. Энэхүү гэрээний дагуу оролцогчид цалинтай ажиллах ба үлдсэн хугацаанд бүх анхаарлаа зөвхөн шоундаа хандуулан дууны бэлтгэл сургуулилтаа өндөр түвшинд хангах зорилт тавин ажиллах гэнэ. Тиймээс цаашид "Камертон-2" шоу нэвтрүүлэг реалити хэлбэрээр үзэгчдэд хүрэх ажээ. Монголын орчин цагийн залуусын өнгө төрхийг илтгэх хэмжээний шилдэг boyband болох зорилгод залуус бүх авьяас чадвар, ур ухаанаа дайчлан хамгийн сүүлийн чухал шаттай нүүр тулан иржээ. Энэхүү 16 оролцогч нэг байранд амьдран хөгжмийн бэлтгэл хийх бөгөөд хамтлаг бүр "Камертон" хамтлагийн дуунуудыг шинээр амьдруулах юм. Мөн ингээд зогсохгүй оролцогчдын бие бялдрын хөгжил, гадаад дүр төрх, гоо сайхан, хувцаслалт гээд бүхий л талаас нь анхаарал хандуулан ажиллах гэнэ. Энэ хугацаанд дөрвөн багт хуваагдсан "Шилдэг 16" оролцогчид тус тус видео клипний зураг авалтанд орох ажээ. Энэ бүхний эцэст "Камертон-2" шоуны шилдгүүд урлагийн тайзнаа хөл тавих анхны гараа болох гала тоглолтыг ирэх 10 дугаар сард Соёлын төв өргөөнөө зохион байгуулснаар шоуны шилдэг хамтлаг тодорно. Энэхүү тоглолтынх нь ерөнхий зохион байгуулагчаар "On and Off" продакшн ажиллах юм байна. Ийнхүү Монголын рок поп ертөнцөд 17 жил тэсрэлт хийж байгаа "Камертон" хамтлагийн залуу залгамж халаа тун удахгүй тодрох нь ээ.
Ө.Халиун
