Лондоны металлын биржид тонн зэсийн үнэ 7543 ам.доллар болж, гурван долоо хоногийн доод түвшинд хүрлээ. Шинжээчид үүнийг еврогийн ханш огцом унасантай холбон тайлбарлаж байна. Мөн Грек улс Евро бүсээс гарах тухай яриа гарч, Олон улсын валютын сан тус улсад ойрын хугацаанд ямар нэгэн санхүүгийн дэмжлэг үзүүлэхгүй гэдгээ мэдэгдсэн нь түүхий эдийн үнэ буурахад нөлөөлсөн хэмээжээ. Түүнчлэн Испанийн Засгийн газрын бондын өгөөж евро мөнгөн тэмдэгт гарснаас хойших бүх цаг үеийн дээд түвшинд хүрч, эдийн засгийн өсөлт нь 0.4 хувиар буураад байгааг Испанийн Төвбанкныхан батлав.
“Лондоны металлийн биржийн хамгийн их өсөлттэй байдаг таваар болох зэс евро бүсийн хямралаас болж хэрхэн дайвалзаж байгааг харж болно” хэмээн “Societe Generale”-гийн шинжээч Робин Бар ярьжээ. “Дараагийн саруудад зэсийн үнийг хэрхэн хянахыг би хэлж мэдэхгүй нь. Ирэх онд АНУ шиг мөнгөний бодлогоо зөөллөх хэрэгтэй гэж би бодохгүй байна. Зэсийн үнэ бидний хяналтаас нэгэнт гарсан учраас оны сүүлч гэхэд хэрхэхийг харж байгаад, ирэх жил ямар бодлого барихаа шийдэх хэрэгтэй” хэмээн тэрбээр өгүүлэв.
Зэсийн гурван сарын хугацаат ханш нэг өдрийн дотор 7389 ам.доллар болж, 56 ам.доллараар буураад байна. Мөн никелийн ханш гурван жилийн, цайр, хөнгөн цагааны ханш гурван долоо хоногийнхоо доод түвшинд хүрлээ. Он гарснаас хойш зэсийн үнэ ийнхүү 12 хувиар буурсан нь энэ. Зэсийн томоохон хэрэглэгч БНХАУ-ын эдийн засгийн өсөлт буурсан, АНУ гадаад өрийн хямралаа зогсоож чадаагүй зэрэг нь ч нэрмээс болж буй аж.
