Н.Наранбаатарт ганган хүүхнүүд таалагддаггүй

УДЭТ-ын найруулагч, жүжигчин Н.Наранбаатар хэлье гэснээ хаана ч хэлчихдэг шударга нэгэн гэгддэг. Оюутан ахуй цагтаа иймэрхүү зангаасаа болж зарим үед “хэлмэгдэж” явсан ч гэлээ, тэрбээр үүндээ огтхон ч харамсдаггүй юм билээ. Харин сүүлийн үед томоохон жүжиг найруулан, хэний хүү болохоо харуулж яваа залуу нэг л зүйлд эгдүүцдэг бололтой. Түүнд   брэндийн шошго хөөцөлдөн, элдэв гоёлд дурлаж явдаг хүүхнүүд ер таалагддаггүй юм байх. Тиймдээ ч театрынхаа залуу охидыг энд тэндхийн арга хэмжээнд, элдэв бусаар олны анхаарлыг татах гэж хичээх хэрэггүй хэмээн загнах, сургамжлахын хооронд сануулаад авдаг гэсэн. “Бие хаа сайтай, хувцас хунар нь нүд гялбуулах шахсан  хүүхнүүд зөндөө л таардаг. Тэднийг харахаар дотор муухай оргиод байдаг юм. Толгой нь хов хоосон, хэдэн юм асуухаар “дон дон” гэвэл яана аа. Өмсч эдэлж байгаа зүйл шигээ өөрийнхөө толгойг бас анхаарч баймаар юм” гэж ихэд бухимдангуй өгүүлж суусан түүнийг найзууд нь дэмий зүйлд санаа зовлоо хэмээн цаашлуулжээ.