Соёлын тэргүүний ажилтан, дуучин Л.Банзрагч энэ зуныг их л завгүй өнгөрөөж яваа гэх.
Саяхан шинэ дууныхаа клипийг үзэгчдэд хүргэсэн тэрбээр гурван цомог гаргахаар шамдаж буй аж. Дуучин залуу поп маягийн хэмнэлтэй нийтийн дуунуудаар цомог гаргах төдийгүй уртын дуутай нөхөрлөн, дунд үеийнхэнд цомгоо хүргэхээр болжээ.
Үүгээр ч зогсохгүй, Д.Банзрагч агсны хит дуунуудыг цомогт багтаан фэнүүдийг нь баярлуулах гэнэ. Энэ тухайгаа тэрбээр “Найз нөхдийнхөө дэмжлэгээр уран бүтээлээ үргэлжлүүлж л явна. Ирэх намар гурван цомгоо зэрэг гаргаж, зүгээр суугаагүй гэдгээ харуулна аа.
Намайг олонд таниулж, энэ зэрэгт хүргэсэн хуучны сайхан хит дуунуудыг цомогт багтаах нь Д.Банзрагч агсны дурсгалд зориулж буй миний сэтгэл юм. Мөн уртын дуугаа судлан түмэн олондоо өөрийнхөө авьяас чадварын нэгээхэн хэсгийг харуулмаар байна.
Мэдээж хэрэг, нийтийн дуугаараа ч бас сюрприз барина” гэж тайлбарласан юм. Харин энэ бүхний дараа бие даасан тоглолтоо хийхээр төлөвлөж буй ч гэлээ, яг хэдийд гэдгийг нь нууцалжээ.
Р.Есүй
